MZP-in ILP dan siamthat mek chungchangah Home Minister-ah rawtna an thlen

Aizawl | Oct 30, 2-025: Mizo Zirlai Pawl (MZP) General Headquarters, Aizawl hruaitute chuan vawiin chawhnu dar 1 khan an president Dr C Lalremruata hovin Home Minister K Sapdanga chu a Pisaah hmuin, Mizoram sawrkarin Inner Line Permit (ILP) dan siamthat mek chungchangah rawtna an thlen.

MZP-in rawtna a thlente hi thu hlawm paruk - administrative efficiency, traveller access, digitalization, enforcement, penalty, leh sponsor mawhphurhna bakah Centralised online ILP portal siam a ngaih thu tarlan a ni a, Aizawl – Sairang rel link tharah entry point lian counter tam zawk, staff training tha zawk leh diltute tan online help desk siam a ngaih thu an thlen bawk.

MZP tarlan danin, Online application hmanga system hi full digitalization, Aadhaar-linked verification, real-time tracking, leh permit dik leh dik loh enfiahna tur mobile apps hmanga siam bakah dan bawhchhiate mipui in an report theihna channel siam tura rawntna, ILP hmang diklo leh validity tawp tawh hnua cham hlen hremna tur bakah dan bawhchhia official-te pawn pawisa chawina hremna dan leh Sponsor tute pawh limit siam sakin, an mawhphurhna tur rawtnaah hian tarlan a ni.

Home Minister chuan, ILP dan an siamthatna tura rawtna hrang hrang MZP hruaitute'n a an thlen chu tha a ti hle a, an rawtna chu ngaih pawimawh a nih tur thu a sawi a. MZP hruaitu tharte nen a inkawmhona hun tha tak an nei thei chu a lawmawm a tiin, tha taka thawhho puiah MZP hruaitute hi a sawm nghal a ni.