MZP Hnahthial-in Oct ral hmain kawng siam an phut; siam loh chuan an thiam anga hmalak an tum!

MZP Hnahthial-in Oct ral hmain kawng siam an phut; siam loh chuan an thiam anga hmalak an tum!

Aizawl | Oct 14, 2025: Mizo Zirlai Pawl (MZP) Headquarters Hnahthial chuan vawiin khan thuthar thedarhtute kawmin, hnahthial district kawng chhe lutuk chu an ngaihthiam loh thu dawiin,  October ral hma ngeia kawng siam an phut a, siam a nih loh chuan an thiam anga hmalak an tum!

MZP Hqrs. Hnahthial President Jimmy Lalrosanga chuan, "31st  October, 2025 ral hma ngeia heng kawng chhiate hi siam tha turin kan beisei a, ni 31.10.2025 ral hmaa siamthat a nih loh chuan MZP Headquaters Hnahthial chuan a tul angin Union Ministry thlengin hma a la zui zel dawn," a ti.

Press Statement

Mizo Zirlai Pawl Headquarters, Hnahthial Executive Meeting chuan National Highway-02 siam mek chungchang chu Ni 26.09.2025 zanah ngaihtuahin NH-02 siam mek  Hnahthial District huam chin Package 03 (Fidelia to Rawpui), Package 02 (Hnahthial Bypass Road), leh Package 04(Fidelia to Mat Lui) te chu ngaihtuahin, kawngpui siam dan chu a lungchhiatthlak kan ti hle a, MZP Hqtrs Hnahthial chuan kawngpui tha zawk kan neih theih nan hmalak ngei nise ati a, hmalak dan tur erawh chu Office Bearers te kutah a dah a ni. Office Bearers Meeting Ni 05.10.2025 a neih chuan hmalak dan tur ngaihtuah nghalin, kan District huam chin kawngpui siamte chu endikna neih a, GPS Camera nen a kawng tha lo lai thla te lak a, Document pawimawhte lakkhawma zirchianna neih nghal nise a ti a, chutiang tak chuan a tuk Ni 06.10.2025 atangin theihtawpin hma a la chhunzawm ta nghal a ni.

Endikna leh a chhe lai thlalakna te neih a nih hnua kan hmuh dan chu hetiang hi a ni :

 Package 04 (Fidelia to River Mat. Chanage No. 166+000 to 192+ 000)(26Km) – Chhim lam kawngpui kan neih mek hi chu a chhe zual em em a, lirthei khalhtute leh zin veivak mite tan phei chuan kal huphurhawm khawp a ni. A tha lai aiin a tha lo lai a tam zawk emaw tih tur khawp hialin a awm a, Minor Defects( chhe liantham lo) kan tih chin ringawt pawh hi 100+ a awm a, Major Defects - Motor tan pawha hel buaithlak khawp hi 30 vel lai a awm bawk a ni. Package-04 lam hi ABCI enkawl lai a ni a, an huam chin hi hriat hran nalh theih khawpin a chhia a, hetih reng lai hian an Website lamah erawh chuan Complete tawh anga tarlan a ni a, amaherawh chu Certificate erawh an la pe chhuak lo a ni.

Package 03(Fidelia to Rawpui. Chainage No. 140+000 to 165+000. )(25Km) – Hmar lam kawng hi chu a chhiat dan a zia mah a, chutihrual chuan Package 03 ah pawh hian a chhe lai, siam that/thawm that ngai hi 50+ vel lai chu a awm tho a, tin, Pangzawl khaw luh dawn Latitude 23.068605 Longitude 92.900455 chu Compensation la buai avangin khawih a la ni lo bawk a, Lat 23.075613 Long 92.90044 atanga Lat 23.076513 Long 92.897928 inkar te chu Compensation buai vang bawkin khawih a la ni lo bawk a ni. 

Package 02(Hnahthial Bypass Road. Chanage No. 0+000 to 7+000) – Package 02 Hnahthial Bypass Road phei hi chu Package 03 leh 04 aiin a chhe zawk a, Hmar lam atanga luh chiah atangin kawng chhia hi a intan nghal a, Km 3 vel atangin two wheeler tlan theih loh khawpin a awm a, hetiang a nih reng lai hian Official Website-ah erawh 94% zo tawh anga tarlan niin, Finance pawh 92% lai an pe chhuak tawh a ni.

7 Km-a 94% zo tawh an intih laiin two wheeler  tana tlan theih loh Km 1 vel lai ala awm leh Retaining wall min leh Kawng khi / bal ala awm nual hi hriatthiam a har kan ti hle a ni.

Heng kan tarlan bakah hian kawngpui siamna avanga lei tawlh leh a tha sain a tawrhna tam tak a awm bawk a, tin, kawng siam nana an hmanrua(material) hman chungchangah pawh duhkhawp loh leh tha tawk lo, lungawipui theih loh tur a awm nual a ni.

Kan District environment-in a tuar kan ti chung pawha kawngpui tha zawk leh veivahna nuam zawk neih beiseina avanga kan lo ngawih fo thin tawhna – he kan District kawngpui -  NH 02 siam a nih atanga kum hnih khat lek chhunga hetianga a awm leh nghal mai leh kawngpui siamtuten Package-03 leh 04 zo tawh anga an insawi leh Package-02 94% above zo tawh min tih sak hi keini MZP Hqtrs Hnahthial chuan hriatthiam har kan tiin kan rilru a na hle a ni. 

31st  October, 2025 ral hma ngeia heng kawng chhiate hi siam tha turin kan beisei a, ni 31.10.2025 ral hmaa siamthat a nih loh chuan MZP Headquaters Hnahthial chuan a tul angin Union Ministry thlengin hma a la zui zel dawn a ni.

Sd/-

(JIMMY LALROSANGA)

President

MZP Hqrs: Hnahthial

Ph: +918414906611

Sd/-

(REMLALNGHAKA)

Secretary

MZP Hqrs: Hnahthial

Ph: +918415027406