"Mizoram leh hmarchhak state-a chengte chu mi dik, inthununna tha nei leh khawngaihna ngah mi an ni,"

Aizawl | October 7, 2025: Regional Institute of Paramedical & Nursing S Sciences (RIPANS) chuan vawiin khan 25th Graduation and Lamp Lighting Ceremony, 2025 an hmang a, Mizoram Larsap, General (Dr) Vijay Kumar Singh, PVSM, AVSM, YSM (Retd) chuan Khuallian niin RIPANS Auditorium-ah a hmanpui a, Mizoram University Exam 2025-a Gold Medalist-te kutah Medal leh Citation hlanin, "Mizoram leh hmarchhak state-a chengte chu mi dik, inthununna tha nei leh khawngaihna ngah mi an ni," a ti.

Larsap chuan, hlawhtlinna chang zirlaite thinlung taka a lawmpui thu sawiin, graduation day chu thawhrimna leh inpekna lan chhuahna a nih thu leh mite tana rawngbawlna, lainatna leh mawhphurhna lantir tura bultanna a nih thu a sawi a. RIPANS zirtir lut tharte duhsakna hlanin an hmalam huna an thawh turte chu hna satliah nilo, midang tana malsawmna ni tura rawngbawlna dik tak, lainatna leh ngaihsakna behchhan a ni, a ti a. Zirlaite chu an profession chu eizawnna atan maia hmang lo tur leh, hna thianghlim, midang tana rawngbawlna zahawm leh ngaihsanawm berte zinga mi a ni tih hriaa inpekna nena thawk thin turin a fuih a ni.

Larsap chuan RIPANS chu India hmarchhaka hriselna lam inzirtirna hmasawn chak zia eitirna hmun pawimawh tak a nih thu sawiin, India ram mai piah lama ram pawn thlenga thawk tur mithiam tak takte chher chhuaktu a ni thei chu chhuanawm a tih thu a sawi a. Hmarchhak state-a health sector tichangtlun tura Ayushman Bharat kaltlanga PM kaihhruai Sawrkar laipui hmalakna fakawm a tih thu sawiin, RIPANS-a khum 100-awmna Hospital sak chuan Mizoram health care a tih changtlun dawn mai bakah zirlaite a tanpui dawn a, hei hi PM hmathlir, 'Sabka Saath Sabka Vikas, Sabka Vishwas, Sabka Prayas' ataka lantirna a ni, a ti bawk.

General (Dr) Vijay Kumar Singh chuan Mizoram leh hmarchhak state-a chengte chu mi dik, inthununna tha nei leh khawngaihna ngah mi an nih thu sawiin, hei tak hi nurse leh paramedical profession dang atana India leh ram pawn Healthcare Institution thlenga an duh em em bikna a ni, a ti a. RIPANS zirlaite chu healthcare global ambassador an nih thu sawiin, hmingthatna chu vawnghim zel turin a chah a. Damlote'n an lakah beiseina sang tak an neih avangin rinaawmna leh hmangaihna nena hna te ber thlenga tha taka hlen chhuah ngei tum turin a chah a. Zir zawh a awm theih loh vangin inzir thara, intuaihriam reng turin a fuih nghal bawk.

Vawiin hun hmanah hian RIPANS Director Dr Sanjay D Sawant chuan thu sawiin, Proficiency Award dawngtu zirlai 88 te hnenah chawimawina a hlan a. Greenwood Hospital, Aizawl Nursing Superintendent Lalruatkimi Renthlei chuan B.Sc Nursing zirlai tharte pual khawnvar chhitna (lamp lighting) leh thutiam sawirualna hun a kaihruai a. Graduate tharte hnenah lawmpuina memento hlan niin, thutiam an sawi rual a. Zirlaite atangin thlahna thuchah ngaihthlak a ni bawk a. Hemi hnu hian RIPANS 25th Graduation and Lamp Lighting Ceremony Convener Dr H Lalhlenmawia'n lawmthu sawiin hun hman a khar a ni.

Gold medalist MZU 2025 vawiina chawimawina hlante:

1) MSc (Nursing): Malsawmdawngkimi

2) B.Pharm: C Malsawmsangi

3) M.Pharm: Lakpa Rinzing Sherpa

4) BMLT: Tenzin Nodron

5) MMLT: Gunlu Gangmei

6) B. RIT: Tshering Diki Bhutia

7) B. Optom: Dolly Devi

RIPANS hi March ni 30, 1995 ah din niin, tun dinhmunah department 7 - College of Nursing, Department of Pharmacy, Department of Medical Laboratory Science, Department of Optometry, Department of Radio Imaging Technology bakah kumin atanga bultan Department of Physiotherapy leh PG Diploma in Nutrition and Dietetics - hnuaiah zirna programme hrang hrang 12 (UG 6, PG Diploma 1, PG 4 & Post Doctoral 1) kalpui a ni a. Staff 160 (Teaching 51 & Non Teaching 109) leh zirlai 925 an awm mek a ni.

North Eastern State 8 te bakah India ram hmun dangte tan seat allot a ni a. A vaiin zirna seat 243: B.Sc Nursing 50, B.Sc MLT 40, B.Pharm 40, B.Sc RIT 40, B.Optom 40 leh BPT 33 te a awm mek a. Kumin hian Under Graduate 173 leh Post Graduate 45, a vaiin zirlai degree hlan thar 218 an awm a. Chhinchhiah danin RIPANS atang hian vawiin thlengin Under Graduate 2,815 leh Post Graduate 166 te an chhuak tawh a ni.