Manipur Hmar Inpui ten, 'Hmar hi Mizo kan ni,' an tih hi kan pawm lo, Manipur Hmar inpui hi Hmar Hnam phatsantu an ni

Aizawl | Oct 31, 2025: Hmar Peoples' Convention (HPC) General Headquarters, Sakawrdai President Lalrosiem chuan vawiin khan Aizawl Press Club-ah thuthar thehdarhtute kawmin, "Manipur Hmar Inpui ten, 'Hmar hi Mizo kan ni,' an tih hi kan pawm lo, Manipur Hmar inpui hi Hmar Hnam phatsantu an ni," a ti.

HPC President chuan, "HPC chungchangah Manipur Hmar Inpui-te an rawn inrawlh kan remti lo, pawisa pawh an rawn khawn kan remti lo," a ti a.

"Hmar Peoples' Convention (HPC) neitu dik tak kan ni a, kan hriatpui lo a HPC phuahchawp thil ti te chu Hmar hnam do an ni ang," a ti bawk.

Manipur Hmar Inpui-in, 'Hmar hi Mizo kan ni,'an tih HPC-in an duh loh chhan sawiin, "Constitution-ah Schedule tribe order 1950 Part XVII Mizoram 5. Hmar tiin ziak a ni a,10. Any Mizo (Lushai Tribe) tia ziah a ni," a ti.

HPC phuahchawp leh Hmar hnam hminga pawl phuah chawp reng reng chu, tu party mahin lo thawhpui lo turin an ti a. Sinlung Hills Council (SHC) pawhin lo thawhpui lo turin an ti a, "HPC-in Sixth Schedule kan demand avangin HPC volunteer mi 40 chuang kan thi tawh a ni,' a ti bawk.