Aizawl | Oct 30, 2025: BC Lalbiakngura Venghlui Aizawl chu zanin Dar 8:00 PM (30.10.2025) khan Nazareth Hospital, Chaltlangah Cancer natna avangin a thi.
BC Lalbiakngura hi MZP General Headquarters, President hlui niin, tunah hian Mizo National Senior Front (MNSF) President ni lai niin, MNF Gen Hqrs-ah adviser a ni bawk.
Zanin hian an chenna inah lumen a ni ang a, Naktuk chhun dar 1:00 ah Venghlui Presbyterian Kohhran Hall-ah vui a ni ang.
Pu BC LALBIAKNGURA (70)
(1955-2025)
VUINA PROGRAMME
A hun: October 31, 2025 Dar 1:00 PM
A hmun: Gospel Centenary Hall, Venghlui Presbyterian Kohhran
Vuitu: Pastor PC Lalbiaktluanga
Chhungkaw aiawh thusawi: Pi K Lalchhanhimi (A nupui)
Tawngtaisaktu: Upa H Lalnghinglova (Bialtu Upa)
Thlanmuala hun hmangtu: Pastor PC Lalbiaktluanga
Pu BC LALBIAKNGURA hi kum 1955 April ni 18 khan Pu T Laikunga (L) leh Pi Salthangi (L) te inkarah Tualte khuaah a lo piang a, unau 6 zingah 4-na niin, an unau chu hetiang hi an ni.
1. Huansiami W/o C. Chawngbuanga (L), Venghlui
2. Ronghaka (L) Tualte
3. Sangthuami W/o Nghakliana (L), Venghlui
4. BC LALBIAKNGURA H/o K. Lalchhanhimi, Venghlui
5. BC Lalrintluanga H/o Lalsangzuali Sailo, Venghlui
6. BC Ralkapzauva H/o Lalchawimawii, Venghlui.
Kum 1986 April ni 14 khan K Lalchhanhimi (Na-i) nen Presbyerian Kohhran Venghlui-ah Pastor Lalruma kutah an innei a. Fanu pakhat MS Dawngliani W/o Upa Lalzamlova Pachuau, Venghlui neiin tu pali a nei.
Pu BC LALBIAKNGURA hian a naupan lai nun hi an khua Tualte-ah hmangin, Primary School leh Middle School pawh a kal a; Khawzawl High School atangin Matric tha takin a passed chhuak a. Mahni inhlawhfa chawp leh zirtirtu hna thawk chungin Aizawl College-ah zirna a chhunzawm a, tha takin BA pawh a zo a ni.
Pu BC Lalbiakngura te unau hi kum 1979 khan Aizawl Venglui-ah an inbengbel tan a, an Nu leh Pa te nen chhungkaw kimin kum 1983 khan an pem ta a ni.
YMA lamah:
Pu BC Lalbiakngura hi kum 20 mi chauh a nih laiin Tualte Branch YMA ah President a ni a. Tuichang North Group YMA ah Secretary a ni tawh bawk. Aizawl Venghlui-ah hian a that vanglai hun hmangin Khawtlang rawngbawl hnaah theih tawp a chhuah ve thin a. YMA Venghlui Branch ah Kum 1989 - 1993 khan Vice President, Kum 1995 ah Finance Secretary hna a chelh a ni.
MZP / Zirlai Pawl lamah:
Pu BC Lalbiakngura hi Aizawl College-a a kal lai atangin Zirlai hruaituah thlan thin a ni a. MZP Gen. Hqrs. ah hian kum 1987 - 1989 khan President a ni a, Sawrkar hna a thawh hnuin MZP Gen. Hqrs ah Adviser ah ruat chhoh a ni a; kum 20 chuang Adviser hna hi thawkin an chenna In Aizawl Venghlui hi MZP Inpui tih hial a ni.
MZP Kum 90 tlin lawmna Dt.27th October, 2025 khan I&PR Auditorium, Treasury Square-ah neih a ni a, he hunah hian Pu BC Lalbiakngura pawh hruaitu hlun Chawimawina hlan niin, a nupui Pi K Lalchhanhimi’n MZP President hnen atangin a dawng a ni.
MPTA:
Pu BC Lalbiakngura hian khaw hrang hrangah Govt. Primary zirtirtu hna hi a thawk kual a, a hnaah hian a tuiin thahnem a ngai thin hle. Kum 2008 May thla khan Govt. Republic P/S atangin Voluntary-in a pension a ni.
Mizoram Primary Teachers Association (MPTA) ah hian hruaitu hlun a ni a. Kum 1993-2000 -ah Secy i/c Organising, 2002-2004 -ah Gen. Secretary, 2004-2008 -ah President. (President anih lai hian All India Primary Teachers Federation-ah Vice President a ni bawk)
Political Party lamah:
Ram leh Hnam hmangaihna rilru hi Pu BC Lalbiakngura rilruah hian a lian hle thin a, a hna atanga a pension veleh Mizo National Front (MNF) Party zawmin hotute duhsakna zarah chanvo pawimawh tak tak a lo chelh tawh a, a thihni thlengin MNF Gen Hqrs. Senior Front President leh Party Adviser a ni.
MNF Gen. Hqrs-a a nihna chelh tawhte : Executive Member, Secretary, Gen. Secretary, Chief Organiser, President, Senior Front, Party Adviser a ni. Gen. Secretary a nih lai hian District hrang hrang incharge a ni tawh bawk. A dam phawt chuan Hnam Run-ah nitin a office thin a ni.
Kohhran Rawngbawlna:
Venghlui Presbyterian Kohhranah a phak ang tawkin rawng a bawl ve thin a. NPSS zirtirtuah pawh hun rei tak tangin, Kohhran Sub Committee hrang hrangah pawh chanvo a chelh thin. Vawiin a thihni thleng hian Puitling Sunday School zirtirtu a ni a, zirtirtu kum 25 Chawimawina pawh a lo dawng tawh a, Nilai zan thupui hawngtu a ni. Pathian faka zai leh lam nuam ti mi a ni a, a dama harsatna dangin a tlakbuak anih loh chuan inkhawm a thulh ngai lo. Inkhawm dar rik rualin biak inah a thu vang tawh thin a ni.
Chanchintha hrilna lamah pawh a phak ang tawkin thahnem a ngai thin hle a, kum 1989 bawr chho ah te pawh khan Arunachal Pradesh nula pahnih Synod hnuaiah missionary an training tir tawh nghe nghe a. An zirchhuah hnu, Missionary an thawh thlengin vawi engemawzat an thawhna hmunah an nupain an zuk tlawh a ni.
Tin, mi tlahlang, in leh lo neilo engemaw zat an lo tuamhlawm tawh a, a then chu fa ang maia enkawlin mi engemaw zat an lo chhawmdawl tawh a ni.
A mizia:
Pu BC Lalbiakngura hian midangte tana malsawmna nih hi a nuam tih zawng leh a hlimna a ni thin a. Sum leh pai leh thawmhnaw ang zawng pawhin mi thil tihsak thahnem tak a nei a ni. Hmangaihna ngah mi, a unaute leh a tu leh fate hi a ngaihsak thiam em em a. Chhungkhat laina damlote bakah, lehkha zirlai phaia hruai ngai engemaw zat a kalpui a. Tin, pa titi thiam tak a ni a; a report pekte hi a ngaihnawmin thenawm khawvengte pawhin an ngaithla thup thin. Thusawi thiam leh mi biangbiak thiam tak niin, a kalna lam apiangah chhungkhat leh thian tha siam zel thei mi a ni.
A nat dan:
July ni 27, 2025 Pathianni-ah insawisel tanin a inkhawm peih lo a. August ni 7, 2025-ah inentir turin Doctor an pan a, a result-ah typhoid leh zun kawnga hnai awm bakah chuap lam fello hmuh chhuah a ni. Doctor-in damdawite chawh nghalin in lamah an inenkawl zui a. Rin aia a that chak loh avangin September ni 9-ah Doctor an pan leh a, in lamah an inenkawl chhunzawm zel a, a chauh tak zel avangin September ni 15, 2025-ah Civil Hospital-ah admit a ni ta a. Hetah hian a taksa bung hrang hrangte test niin Colonoscopy atangin ril cancer a ni tih hmuhchhuah a ni. Theihtawpa Doctor leh nurse ten an enkawl hnuah a taksa te ti chaka damdawi thaa inenkawl turin October ni 1, 2025 khan in lamah an haw a. In lamah theih ang anga damdawi thate eia enkawl a ni chungin hma a sawn hlei thei lova. October ni 17, 2025-ah Doctor-in a rawn angin Nazareth Hospital, Chaltlang-ah admit leh a ni a. Doctor leh nurse ten theihtawpin an enkawl a, mahse hmasawn lam aiin hniam lam a pan zel a. October ni 30, 2025 zan dar 8:10 pm-ah Lalpa hnenah min lo chawlhsan ta a ni.
LAWMTHU SAWINA
Kan Pa, BC Lalbiakngura'n min boralsan chungchangah hian lawmthu sawina tur tam tak kan nei a. Kohhran mipui, chhungkhat leh thenrual thate, a damloh chhunga bang lova min tawngtaisaktute leh rawn kantu zawng zawngte; hmangaih taka enkawltu Doctor leh Nurse te, YMA - nula leh tlangval zan khuaa min tlaivarpuitute chungah thinlung takin lawmthu kan sawi a, kan chunga in thatnate hi a let tam takin Pathianin malsawm che u rawh se.
K. Lalchhanhimi (Na-i), Venghlui, Aizawl
------------
HLA : NI ROPUI A LO THLENG DAWN TA,
KHB No.250
Ni ropui a lo thleng dawn ta,
Kan nghak Lal Immanuel;
Sual leh ramhuai tlawmna ni chu,
Chhandam fate kan zalenna tur chu.
Chumi hunah chuan hlimin ka zai ang,
Lal ram buatsaih chatuan hmun ka chang ve ang a,
Aw, a va nuam dawn em!
Aw, a va hlimawm dawn em!
Hlim tawp hlau lovin ka leng ang.
Eng tikah nge ni ang Lalpa,
Hnehna ni kan hmuh hun tur,
Thlawkin Jordan ka lo kaia;
I tan van arsi angin ka en ang?
A ni tak e, chatuan Lalpa,
I khawpui siam tharah chuan,
I thisena i lei tawhte,
'Ka hnenah lo kal r'u,' i tih thin kha.
Aw khawpui thar i mawi mang e,
I chhungah hnehtu an leng;
An hnehna hla thar sak tur chu,
Khawvel ral hun atan an dah ta e.
"Nu mittuiin a fa nunna a chhan thei lo, i thisenin a chhan thei a sin,"
Thisen pe la, nun chhanhim rawh.
| EXPLORE MIZORAM |
• Mizoram's Most Trusted Website | Mizoram's Online Encyclopedia •
[ For Ads - Contact +919402125273 ]
email: admin@exploremizoram.com
Telegram channel:
Twitter: https://twitter.com/exploremizoram
Instagram: https://www.instagram.com/explore.mizoram
Youtube Channel: https://www.youtube.com/channel/UCyNrX06aSZ26HkIB25eo1YQ
Post a Comment
He post chungchanga i ngaihdan lo sawi ve rawh: