Mipui lei theih turin GIG Motors-in Aizawl-ah Maruti Suzuki 'Victoris' tlangzarh; 'fak chawp ngai lo,' an ti

Aizawl | Oct 8, 2025: GIG Motors chuan vawiin khan mipui a duh apiang lei theih turin Maruti Suzuki kutchhuak lirthei thar ber 'fak chawp ngai lo,' tia sawi 'Victoris' chu Maruti Suzuki Arena, Edenthar-ah an tlangzarh a, 'Victoris' hi Motor sport lama sulsutu leh Khawzawl district-a District Education Officer (DEO) ni mek Lalrawngbawla'n a tlangzarh.

Vawiin Victoris tlanzgarhna hi GIG Motors General Manager Joseph C Vanlalrinngheta'n a kaihruai a, Senior Relationship Manager (SRM) Israel Lalliantluanga hunserh a hmang a, GIG Motors Chief Executive Officer (CEO) John Lalpeka'n lawmthu sawinain hun a khar a ni.

Victoris hi tunlaia lirthei technology thar ber ber nena duan leh remkhawm a ni a, lirthei changkang a awm tur ang chi chu a awmkim vek tiin an sawi hial. "He lirthei hi chu fak chawp a ngai lo!" an ti. He lirthei changkang ru tak hian, Hyundai Creta, Kia Seltos, Honda Elevate leh Skoda Kushaq, Toyota Urban Cruiser Hyryder leh Tata Nexon bakah Maruti Suzuki Grand Vitara, te hi a elpui tur te an ni.

Victoris hi chi hrang (variant) hrang hrang - Victoris 1.5L 5-Speed Manual Transmission (SMT), Victoris 1.5L 6-Speed Automatic Transmission (6AT), Victoris 1.5L Strong Hybrid (eCVT) leh a to ber Victoris 1.5L AllGrip Select (GAT) te a awm a ni.

Victoris 1.5L 5-Speed Manual Transmission (SMT)-ah hian model chi 10 a awm a, a man tlawm ber hi On Road-in cheng 12,28,789 niin, a to ber hi Rs. 18,52,629 a ni.

Victoris 1.5L 6-Speed Automatic Transmission (6AT)-ah hian model chi 9 a awm a, a tlawm ber hi on road-in Rs 15,49,948 niin, a to ber hi Rs. 20,72,765 a ni.

Victoris 1.5L Strong Hybrid (eCVT) -ah hian model chi hrang chi 9 awmin, a tlawm ber hi on road-in Rs. 18,95,347 ni a, a to ber hi Rs. 23,05,105 a ni.

Victoris 1.5L AllGrip Select (GAT) ah hian model chi li a awm a, a tlawm ber hi Rs. 21,59,292 a ni a, a to ber hi Rs. 25,40,496 a ni a, hei hi tun dinhmuna Victoris to ber a ni.