Aizawl | Oct 15, 2025: Mizoram-a mimal enkawl tur ATM Booth 11-na chu nimin (14th Oct,., 2025) tlai dar 3:00 pm khan Maubawk Sikul Veng-a Pu Lawmkima Tlau Building-ah Maubawk Local Council Chairman Pu VL Hmangaihthanga chuan a hawng.
Hawnna inkhawm ATM Booth kawta neih hi ATM Booth pechhuaktu Vakrangee Kendra Master Franchisee Mizoram Pu Sellai Lalrinawma chuan a kaihruai a, Maubawk Veng Local Council member te leh Franchisee chhungkua bakah khawtlang hruaitute an tel tha hle a; Maubawk West Kohhran Upa J. Lalhmachuana chuan ATM Booth hi tluang taka a kal theih nan Pathian hnenah a hlan a ni.
Maubawk Veng Local Council Chairman Pu VL Hmangaihthanga chuan, an vengin an mamawh em em ATM Booth an khawtlanga hman theiha peihfel a ni chu a buatsaihtu Company leh Pu Lawmkima te chhungkaw chungah lawmthu a sawi a. Maubawk veng bakah veng thenawm te pawhin an rawn hman tangkai ngei a rin thu sawiin, Maubawk Veng tiluntu leh hmasawnna thlentu a ni ang, a ti.
Master Franchisee Pu Sellai Lalrinawma chuan Maubawk vengah mimal enkawl ATM Booth hman tura peihfel a ni ta chu lawmawm a tih thu sawiin, mimal enkawl mah nise a chhawr tangkaitu tur chu Maubawk veng mipuite bakah veng thenawmte an ni dawn a. Tangkai taka hmang turin duhsakna ka hlan a, Gpay leh UPI pawisa inthawnnate hi hmang nasa viau tawh mahila; CASH/pawisa kan mamawhna hi a tlahniam tak tak dawn lo. Chuvangin, Aizawl khawpui chhung leh Mizoram khawpui dangahte mimal building nei thate chuan ngaihven ve thei se Khawtlang hmasawnna a ni ang, a ti.
Post a Comment
He post chungchanga i ngaihdan lo sawi ve rawh: