Oct 19 ral hma ngeia tlan nuam tawk taka an siam lo a nih chuan, kan kal zel dan tur sawiho kan tum!

Tipper hruaituten Bairabi - Kolasib leh Vairengte - Sairang kawng chhia an tlawh; lirthei rit phur te tana chhiatna nasa zawk thlen theihna a la tam hle!

Aizawl | Oct 15, 2025: Mizoram Tipper Association District Hqrs Kolasib Hruaitu te chuan vawiin khan Bairabi - Kolasib leh Vairengte - Sairang inkar kawng chhia te hmunah kalinan tlawh.

Mizoram Tipper Association District Hqrs Kolasib hruaitute chuan "Oct 19 ral hma ngeia tlan nuam tawk taka an siam lo a nih chuan, Oct 19 zan hian kan kal zel dan tur sawiho kan tum!," an ti..

Tipper hruaituten Bairabi leh Kolasib inkar kawng chu hmun tam takah khuar hlauhawm hnawh that ngai a tam an ti hle a. Tin, Kawnpui - Sairang hi hmun tam takah lirthei rit phur te tana chhiatna nasa zawk thlen theihna ala tam hle.

"Tipper hruaituten kan tlawh lai hian hnathawk chu awm mahse kan kawng chhiat tawh dan nen a en in an hnathawh hi a nep kan ti in a beitham kan ti hle," an ti.

Mizoram Tipper Association District Hqrs Kolasib chuan, "He lai kawng REPAIR hna khawih tute hi BR GOYAL Pvt Ltd te an ni a. Tin, helai hmun hi Main Contractor hi NHIDCL hnuaia JHANDU COMPANY te an ni a, anni company te hian an hmanrua (khawl, labour, lung etc.) pakhat mah an la inchhawp lo chu hriatthiam har kan ti hle a. Tun ṬHÂL chhunga hna hi thawh zawh hman an tum a nih chuan kawng siamna hmanrua te tun hunah hian an inchhawp ngei ngei tawh turah kan ngai a. Hei hi October 19, 2025 (Chawlhni) ral hma ngei a, tlan nuam tawk taka an siam lo a nih chuan kan KAL ZEL dan tur hi October 19, 2025 zan hian Committee a sawiho kan tum leh a ni.

Chutihrualin, kan kawngpui pawimawh tak hi thuneituten a rang lama hma min lak sak vat turin kan ngen a. He kawng aṭhat theihna atan hian ZORAM MIPUI zawng zawng ten min vei pui a, kan hmalakna te Zoram tan ani tih hria a min thlawp tlat turin kan in ngen in kan in sawm bawk a ni." an ti.