Lungleiah District Development Co-ordination & Monitoring Committee (DISHA) an ṭhu khawm

Lunglei | Oct 7, 2025: Lunglei District Development Co-ordination and Monitoring Committee (DISHA) chu vawiin khan an Chairman, Member of Parliament (Lok Sabha) Richard Vanlalhmangaiha hovin Lunglei DC Conference Hall-ah an ṭhu khawm.

Chairman Richard Vanlalhmangaiha chuan Lungleia DISHA ṭhut khawm chu Lok Sabha MP a nih anga DISHA ṭhut khawm a kaihhruai hmasak ber tur a nih avangin chhinchhiah tlak a tih thu sawiin, DISHA-a sawrkar laipui ruahmanna hnuaia hmasawnna hna thawh dan thlir hona chuan ram hmasawnna kawngah rah ṭha tak a chhuah a beisei thu a sawi a. Line department-te inbuatsaihna leh hna thawh fakin, hlawhtling leh awmze nei zawka hmasawnna hna thawh kalpui a nih theih nan department hrang hrangte chu an hma zawn ṭheuhvah theih tawp chhuah chhunzawm zel turin a chah a. Scheme kalpuinaa harsatna awmte pawh inthlahrung lova a hnena thlen ṭhin tura chahin, a theih ang anga chin fel dan ngaihtuahpui a inhuam thu a sawi.

Lunglei DISHA ṭhut khawmah hian Lunglei West bialtu MLA T Lalhlimpuia, Deputy Commissioner & Member Secretary Navneet Mann leh DRDO Project Director ST Lalvensangi te bakah, line department official-te leh Lunglei District Consumer Association hruaitu te an tel a. Sawrkar kum kal mek 2025-2026 1st Quarter leh 2nd Quarter (April - September) inkar chhunga Lunglei District-a sawrkar laipui ruahmanna hnuaia hmasawnna hna hrang hrang kalpui dan thlir ho niin, harsatna awmte leh a chin fel dan tur leh hma lak zui zel dan tur te sawi ho a ni.

He DISHA ṭhut khawmah hian sawrkar laipui scheme hrang hrang - RD&A Department hnuaia MGNREGS, PMAY-G, PMAY-G Awaas Plus, PMKSY 2.0, MzSRLM leh DDU-GKY te; PHE Department hnuaia AMRUT 2.0, JJM leh SBM(G) te; PWD hnuaia PMGSY te; H&FW Department hnuaia National Health Mission (NHM) programme hrang hrang te; Transport Department hnuaia VAHAN leh SARATHI te; LAD hnuaia RGSA leh 15th Finance Commission Grant te; FCS&CA Department hnuaia PMUY leh NFSA te; AH & Vety Department hnuaia NLM, NADCP, NAIP, RGM leh NPDD te; LR&S Department hnuaia DILRMP te; Agriculture & FW Department hnuaia RKVY, SHC, PM-KISAN leh scheme dang te; School Education Department hnuaia Samagra Shiksha, PM-POSHAN (Mid-Day Meal) leh PM SHRI School te; Social Welfare Department hnuaia NSAP, AIC leh UDID te; Women & Child Development Department hnuaia ICDS, BBBP, PMMVY, Saksham & Poshan 2.0, OSC leh CP&SC te; Commerce & Industries Department hnuaia PMEGP te; UD&PA Department hnuaia SBM(U), PMAY(U), DAY-NULM leh AMRUT 2.0 te; Fisheries Department hnuaia PMMSY te; LESDE hnuaia NCS, e-Shram leh PMKVY te; BSNL hnuaia 4G Upgradation & Saturation Project te; RSETI hnuaia Skill Development Training hma lakna te sawi ho a ni.

Lunglei DISHA ṭhut khawma tar lan a nih danin, MGNREGS hnuaiah Lunglei District-ah job card nung lai 20,162 awm mekin, April-September 2025 chhungin ni 59 inhlawhna siam a ni tawh a. Material component aṭanga hna thawh 1,426 awmin, hna 623 thawh zawh tawh a ni a, thawh lai mek 803 a la awm.

AMRUT 2.0 hnuaia cheng nuai 997.78 senga Greater Lunglei Water Supply Scheme tihchangtlun hna thawh mek chu 85% zawh tawh niin, cheng nuai 795.21 senga Tlabunga WSS (Solar Pumping) tihchangtlun hna thawh mek pawh 70% zawh tawh a ni a. SBM(G) hnuaia cheng nuai 16 senga Ṭhaizawla Plastic Waste Management Unit sak chu zawh fel tawh niin, July ni 17, 2025 aṭang khan hman ṭan a ni.

Samagra Shiksha hnuaia kum 2025-2026-ah Lunglei District chhunga zirlai 9,380 hnenah a thlawnin sikul thuam (uniform) sem a ni a, zirlai 10,030 hnenah a thlawnin zirlaibu sem a ni bawk a. PM-POSHAN hnuaiah sikul 441-a zirlai 20,720 hnenah a thlawnin chawchhun pek a ni bawk.

NSAP hnuaiah tun kum kal mekah hian Lunglei District chhungah tar chawmna (old age pension) la mi 3,703; hmeithai (widow) pension la mi 307, vohbik (disability) pension la mi 102 leh National Family Benefit Scheme ṭanpuina sum dawng tur chhungkaw 30 an awm a. Vohbikte hamṭhatna atana hma laknaah, Lunglei District chhungah vohbik mi 633 chu Unique Disability Identity (UDID) siamsak tawh an ni.