"Hmar hnam hi Zofate ram delh chinah chuan a daidotu in ni, Hmar lama Zofate kulh bang, kan hnam ralvengtu santiri in ni,"

Aizawl | October 2, 2025: Hmar Students' Association (HSA) Joint Headquarters, Aizawl buatsaihin vawiin khan Art & Culture Auditorium, Berawtlang, Zemabawkah HSA Day vawi 87na lawmna leh Freshers Social hun hman a ni a, Mizoram Assembly Speaker Lalbiakzama'n khuallian niin a hmanpui a, Lalringdika, IPS chu khualzahawm a ni.

Khuallian Speaker Lalbiakzama chuan, "Hmar hnam hi Zofate ram delh chinah chuan a daidotu in ni, Hmar lama Zofate kulh bang, kan hnam ralvengtu santiri in ni, in awmnaah hian awm ta lo ula, hei ai hian Zofate ram luah chin hi a zim dawn tih hi a chiang em em a ni. Chutiang taka kan hnam himna pal lo ping tura hnam huaisen in lo awm hi Mizo hnam tan pawha kan vanneihna a ni," a ti a.

"HSA-in freshers social a buatsaih hi a lawmawm a, zirlai tharte kuangkuahna ṭha tak a ni a, mahse, intihlangnelna leh hlimhlawp bawlna satliahah a luangral ang tih a hlauhawm," a ti a. In nun dan hian hlawhtlinna kawng chhukchhoh zia te, inrintawkna te hi chhelna nen rim taka thawk chunga hlawhchhuah chi a nih dan te in inzirtir zawk tur a ni, a ti a. "in rilru a la thianghlim a, pangpar a kuhmum aṭanga a parhchhuah hlim ang maia la thianghlim leh duhawm hi dawngdahna leh nuamtawlna hmangin in tichhe tur a ni lo, tih hram hramna tel lo chuan hlawhtlinna a awm lo tih hria ila. Hlawhtling tur chuan, mi an intawllen hunah, kan rualpuite hlim taka an awm emaw kan tih hunah khawhar taka lehkha zir ṭul chang a awm fo dawn a ni. A chang chuan, jail tang ang maia inkhung a ṭul dawn a, lehkha zirna sala tan hi saltanna zawng zawnga hlawk ber a ni, thufing chuan in ro leh thil dang chu min laksak thei a, thiamna chu min laksak thei lo. Nangmah leh Zofate kan dinchhuahna atana thil pawimawh tak a ni," tiin zirlai kalkhawmte fuihin a chah bawk.

Khualzahawm Lalringdika, IPS pawhin zirlai kalkhawmte chu hun vawn dik leh mahni inthunun a pawimawh zia te, hlawhtlinna kawnga thawhrim a ṭul ziate hrilh, Mizoram tan leh hmar hnam tana fahrin manhla ni ṭheuh turin a chah bawk.

HSA Joint Headquarters, Aizawl President Lalramliana Ralsun chuan, HSA member kalkhawmte fuihna thu sawiin, "Hmar nula tlangval chu a rinawm a, hnaa chhawr atan pawh an taima a, Hmar ngei an ṭha," tih chu miin min sawi dan ni ṭhin se, chumi ni tur chuan theihtawp chhuah tlang ang u," a ti a. "Hnam a kan chian dan leh kan intih-Hmar danah pawh mi dang tana hnawksak lo zawnga awm ṭhin nise," a ti a, "Hmar takin a Mizo theih a, Mizo takin a Hmar theih," a ti bawk.

Vawiin hian IPS pahnih - Lalringdika leh J Lalthafamkima, ICFAI University Vice chancellor Dr Ginlianlal Buhril, MBBS zo mi panga - Lalduhawmi, Nancy K Lallawmzeli, Lalnunthari, Roneikim, leh Vanlalhruaitluanga, B.Sc Environmenral Science 2nd Rank Holder Lalmalsawma, LLB zo pahnih - Rejoy Lalnunpuia leh Lalnunsiami te bakah B.Ed zo Lalhmangaihzuala leh MMA Fighter Nazareth Lalthazuol te hnenah chawimawina an hlan a ni a. Anni bakah hian, pawl 10 leh 12 a tiṭhate lawmpuina hlan an ni bawk.

Vawiina chawimawite hi IPS pahnih, ICFAI University Vice Chancellor, MBBS zo panga, Graduate pali leh MMA Fighter te an ni.

HSA day lawmna hi Felicia Z Hmar leh Fimliensang ten an kaihruai a. Evangelical Free Church of India (EFCI) Regional Secretary Rev Jessai L Neitham in hunserh a hmang a. HSA Joint Headquarters, Aizawl General Secretary Andrew Lalngaihzuala'n report a pe a, Sinlung Hills Council, Hmar lnpui Mizoram Region & HSA GHQ, HSA General Headquarters atangin thuchah ngaihthlak a ni a. MZP, MSU, MSO, MBSA, SSPP, LSA, PZP, RSU leh Joint Hnampual atang tein thuchah ngaihthlak a ni bawk.

HSA Joint Headquarters, Aizawl Office Bearer te chu President - Lalramliana Ralsun, Vice President - Liensangvung, General Secretary - Andrew Lalngaihzuala, Assistant General Secretary - Daniel Lalringsan, Treasurer - Rachel Lalhmangaihzuali leh Finance Secretary - Fimliensang te an ni.

Hmar Students' Association (HSA) hi October 3, 1939 khan Imphal, Manipur-ah din ṭan a ni a, Mizoram-ah chuan, July 13, 1986 khan Pu Thangliensung a in, Electric Sihpui Veng, Aizawl-ah din a ni a; hruaitu hmasate chu; President- Lalsiemhnun (Govt. Saitual College Principal ṭhin) Vice President- Lalkhawmawia, Secretary- Laltlanchunga Hrangchal, Assistant Secretary- Lallungkhama, Finance Secretary- VL Chhuanga Hrangchal, Treasurer- H Lalneihkimi te an ni.

HSA hnuaiah hian Joint Headquarters 13 awmin, Mizoram-ah Joint Headquarters pathum - Aizawl, Kolasib leh Sinlung Hills Joint Headquarters te a awm a, India khawpui lian hrang hrangah Branch 6 awmin, Joint Headquarters hrang hrang hnuaiah unit 100 chuang a awm mek a ni.