Aizawl | Oct 28, 2025: Mizoram Pradesh Congress Committee (MPCC) Spokesperson Lalbiakzama chuan vawiin chhun dar 1 khan Aizawl Press Club-ah thuthar thehdarhtute kawmin, FCAA 2023 chungchanga a ngaihdan a sawi a, "He dan siamthatah hian kan CM sawi anga State sorkar thuneihna pekbelhna awm reng reng ka hmu zo lo," a ti.
.jpeg)
MPCC Spokesperson chuan, "Forest (Conservation) Amendment Act (FCAA), 2023 (FCAA) chungchang hi Mizoram Joint Civil Society ten Vanapa Hall kawt function an huaihawta ka sawi bak kha chu sawi pawh ka tum tawh lo a.
Mahse, kan CM zahawmtakin ZPM party office, Dampa By-election Campaign leh CYMA Conference Sakawrdai-ah te a rawn sawi leh takah chuan tlema han tuihnih sak ve tulin ka hria a. Mizo mipuite leh kan thalai ten amah kan CM in a ngen ang che u in ngun taka ngaituahna lo hmang ve turin ka ngen che u a ni," a ti.
He Dan thara Section pawimawh lai ber, a KAIKUANG lai chu -
Sec. 1A sub sec. (2) hi a ni
(2) The following categories of land shall not be covered under the provisions of this Act
A ti thawr mai a, hetah hian a ni International Border atanga 100 Km tih a rawn lanna chu.
Clause (c) sub clause (i) ah ‘as is situated within a distance of one hundred kilometres along International Border…’
Sub sec.(3) ah sub-sec (2) in he DAN in a huam lo ang a tih hmunte hman theih dan ‘Terms and Conditions’ a siamah chuan Central Sorkar-in kaihhruaina a siam thin ang zel a ni ang… tiin a tlip a.
He kaih hruaina bak hi ‘Rules’ tuna ka hmuh theih chinah chuan Sec. 1A sub sec (2) kaih hruaina bik awm reng reng ka hmu zo lo.
Entirnan, khaw pakhatin ramngaw humhalh, an khaw chhim leh hmar-ah nei ta se, Sorkar-in ‘Heng ramngaw enkawl dan thar siamin Chhimlam ngaw chu he dan hian a huam ve lo ang ti se. Dan tharin a huam lam ngaw enkawl dan tur chipchiar takin siam se, a huam ve loh lam enkawl dan tur chu sorkar-in kaihhruaina a siam ang zel a ni ang tiin dah ta bawk se...Chu nen chuan a inang reng a ni lawm ni?
Tichuan he FCAA, 2023 Provision in a huam (cover) ve loh takah chuan Rules pawh Sub. Sec.(3) bak hi siam ngai an ti rih lo em ni ang? Dan hi khek rek ru taka siam theih a ni tih hi hriat a pawimawh khawp mai. Danah hian ‘Loopholes’ famkim loh na lai a awm thei a, chu chu a duh leh ngaihna hriate chuan an hmang sual fo thin a ni. He Danah hian chutiang loopholes chu awm thei viau dawn a ni.
Tuna a lan danah hi chuan Central sorkar thu thu a ni thei dawnin a lang tlat a ni.
Tuna kan sorkar in Restricted Tender Blanket Approval a pek thin ang mai hian FCAA 2023 kan lo adopt (pawm) hian Central sorkar hi kan State chhungah a duh ang anga tal theih nan 'Blanket Approval' kan lo pe ve reng a ni thei em…tih hi chhut ngun ang u.
He dan siamthatah hian kan CM sawi anga State sorkar thuneihna pekbelhna awm reng reng ka hmuzo lo bawk…Rules-ah pawh ‘Approval of Central Govt… Central Govt. may by order specify tih leh Central Govt. may issue directions…’ tih a ni vek mai.
International Border atanga 100 Km tih leh 10 Hctrs chungchang chu kan MNF unaute khan an sawi tawh a, Sakawrdai-ah khan kan CM zahawmtak khan a hresual palhah ngaihsak ang aw!
Mizoram hi a vanglam zaulai berah 116 Km anga ngaih a ni a, khawthlang leh khawchhak atangin 100 Km pawh tawn chuan min tuam hneh khawp ang.
He FCAA, 2023 hi chuan National Security and Strategic Importance…chhuanlama hmanga Northeast Minority State te min paldarh an tumna hmanrua a ni tlat. Manipur leh Ladhakh an sawisak duh dan en hian ngaih a tha theilo a ni ber mai. National Security leh Strategic Importance issue te hi sorkar tan hmanraw tangkai leh duh zawng tih theihna chhuanlam pawimawh leh tha ber a ni thin tih hi Police a kum 32 zet kan thawh chhung khan ka hre ve in ka hria.
Mahse heti chunga kan CM zahawmtak in a thlamuanpui Dan te hi inbih ve teh ang.
1. BEFR 1873 leh FRA 2006 te hi Minor Acts kan tih zinga mi an ni a, heng dan te hi Constitution Dan an ni lo, a awmzia chu Parliament in Simple Majority-a atih danglam theih an ni. (FCAA pawh hi BJP kaihhruai NDA, kan MNF unaute pawh an telna sorkar in opposition te tello a an pawm anih kha)
2. 7th Schedule entry 18 leh 23 te hi State in Dan kan state chhunga kan lo siam ve theihna a ni. (Union List, State List leh Concurrent List te an awm). Mahse, State Act leh Central Act a in kalh chuan Central Act kha dingchang zawk tura dah a ni. Lo thlamuanpui viau chi anih hmel loh.
Mi thenkhatin he Dan hi FCA Ammendment chauh a ni a, a dan pum FCA 1980 kan hmanlai in Ammendment chauh kan hnawl theilo, Art 371G kan neih hma a mi anih vangin ti te pawh kan awm a ni awm e.
Dan Pum piahlamah Section leh sub sec thlengin Art 371G a kan Constitutional Safeguard sedai rawn thiat thei ni a kan hriat, Art 371G kan neih hnu a mi chu kan duhlo thei teh meuh mai. Sorkar hna kan thawh ve lai pawh khan IPC leh POCSO Dan a Section thenkhat hi Art 371G invoke a ennawn a tha ang em tih te pawh kan nei ve rum rum thin.
FCA 1980 hnu a T.N Godavarman case a Supreme Court ruling 1996, kan CM zahawm takin harsatna thlentu ber nia a sawi kan neih hnu pawh hian Mizoram mipuite kan zawh duh chu ‘Tu nge lo a vah dawna Forest Clearance’ dil tawh? Tu huan leh Leilet nge ‘I nei thei tawh lo’ an tih sak? Development hna engzah nge kan lo thawh tawh? TN Godavarman Ruling hnawk zia sawi laia BEFR ACT leh FRA sawi tel duhlo khan FCAA hlauhawm loh zia tanchhanah ti nge a rawn hman leh si?
Tin, heng DAN kan nei chung pawha kan ram ngaw chereu nasat tawh dan hmu a hretu te vek kan ni. Kan tu leh fa tamtak hian Mizo ten RAMNGAW kan tih hi hmuh tur an rawn nei tawh dawn lo. Kan hriat tlan a tana pawimawh chu ‘Kan ramngaw leh nungcha te hi mihring te tello hian anhimin an thangduang thei a, mahse mihringte hi an tello chuan kan dam khaw chhuak dawn lo’ tih hi a ni.
Kan CM zahawmtakin Vairengte leh Sairang inkar kawngpui chhiat rei chhan Forest Clearance hmuh har vanga a puh hi hriat thiam a har bawk. Double Lane Highway a tlangna a rei tawh a, chumi chhelai siam nana FC lak ngai ta tlat mai hi thil mak tak chu a ni. Sorkar hmasa te pawn vawiduailo an lo siamtha tawh thin bawk si a.
Hmanni lawk khan kan President Pu Lalthanzara Delhi-ah kal in AICC hotute nen sawihona an neihah chuan Central-ah INC leh a thurualpui te kan lal hunah he dan hi kan ennawn ang ti in an lo hrilh a ni.
"Nu mittuiin a fa nunna a chhan thei lo, i thisenin a chhan thei a sin,"
Thisen pe la, nun chhanhim rawh.
| EXPLORE MIZORAM |
• Mizoram's Most Trusted Website | Mizoram's Online Encyclopedia •
[ For Ads - Contact +919402125273 ]
email: admin@exploremizoram.com
Telegram channel:
Twitter: https://twitter.com/exploremizoram
Instagram: https://www.instagram.com/explore.mizoram
Youtube Channel: https://www.youtube.com/channel/UCyNrX06aSZ26HkIB25eo1YQ
Post a Comment
He post chungchanga i ngaihdan lo sawi ve rawh: