"ZPM Sorkar hian SASCI loan puk tam duh vangin Zirlaite Scho a dahkham!"

# ZPM sorkar-in SNA SPARSH model-ah scholarship a ‘on board’ avangin zirlaite'n scholarship an la dawng thei lo, zirlai 41,228 in an tuar mek!

Aizawl | Sept 24, 2025: Mizo National Youth Front (MNYF) Vice President Lalnunmawia Pautu chuan vawiin chhun dar 12 khan Aizawl Press Club-ah thu thar thehdarhtute kawmin, ZPM Sorkar hian SASCI loan puk tam duh vangin Zirlaite Scho a dahkham, niin a sawi.

MNYF Vice President chuan, "ZPM sorkar-in SNA SPARSH model-ah tribal scholarship scheme a ‘on board’ avangin zirlaite'n scholarship an la dawng thei lo, zirlai 41,228 in an tuar mek," a ti bawk.

MNYF Vice President Lalnunmawia Pautu Press Statement kimchang:

Mizoram Zirlaite’na an nghahhlelh em em Tribal Scholarship chu kum 2023 - 2024 ah dawng kim loin, kum 2024-2025 ah an dawng miah lo a, zirlaite’n an chanvo Scholarship a huna an dawn theih loh chhan hi MNF Thalaite chuan Central sorkara Ministry of Tribal Affairs leh Finance Ministry hnuaia Department of Expenditure-ah te chhuiin Mizoram Sorkarin Scholarship Scheme chu a Department changtute pawh rawn loin SNA SPARSH MODEL (Single Nodal Account-System for Pension Administration RAKSHA)-a a lo “On Board” (ziahluh) vang a ni tih kan hmuchhuak a, hmanhmawh tak leh a scheme enkawltu Mizoram Scholarship Board pawh rawn lova a ruk a rala he scheme SNA SPARSH Model system a “on board” chhan hi SASCI loan puk tam duh vang a ni tih pawh phat rual lohvin a chiang niin kan hria a ni.

July Ni 7, 2025-a Ministry of Tribal Affairs-in Mizoram sawrkar hnenah Rs 50,42,81,000/-(Vaibelchhe sawmnga, nuai sawmli pahnih, singriat leh sangkhat) a rawn pek tawh laia vawiin thlenga zirlaite hnen a la thleng lo hi hriatthiam har kan ti a, ZPM Sorkar hian a lo tihdik lohah mawh lain Zirlaite Scholarship pek vat a nih theih nana tihfel ngai chu tifel zung zung rawh se.

CSS Scheme-te SNA SPARSH Model-ah “onboard” mek zel a ni tih kan hria a, CSS tam tak “onboard” loh a la awm laia a Portal-ah pawh Mizoramin duh duha thuneihna a neih lohna scheme, zirlai tam tak tawrhna thlen thei ni si sum puk tam nana an lo DAHKHAM hi a pawi em em a ni. MNF Thalai chuan kum 2023 a ZPM-in sawrkarna an chan atangin tun thleng hian zirlaite'n Scholarship an dawng mumal thei ta lo hi pawi kan ti a, record-a a lan danin kum 2023-2024 session zirlai 3981- in Scholarship an la dawng kim lo a, kum kalta 2024-2025 session post matric zirlai 28459 leh pre-matric 8788-te’n scholarship an la dawng miah lo a ni. Hei hi ZPM sawrkarin zirlaite a ngaihsak tawk loh vang leh sorkar sum enkawl dan an thiam tawk loh vang a ni. ZPM Sorkar hian SNA SPARSH MODEL-ah Zirlaite a dahkham a, vawiin thlengin an chanvo an la chang lo a ni.

MNF Thalai chuan zirchianna pawh nei lo leh eng nge a nghawng tur pawh ngaihtuah hauh loin Mizoram Sawrkarin SNA-SPARSH (Single Nodal Account-System for Pension Administration RAKSHA) a lo On board avangin Ministry of tribal atanga sum sanction awmsa tawh Mizoram Scholarship Board hnuaia Zirlaite kut a thlen theih loh phah ta a ni. North East State ah Nagaland tih loh State dangin Single Nodal AgencySystem for Pension Administration RAKSHA (SNA-SPARSH) On Board an duh loh lai a, rang taka ZPM sawrkarin a lo On Board avanga zirlaite tawrhna hi a pawi kan ti hle a ni.

MNF Thalai chuan zirlai tam tak Scholarship-a innghat leh Hostel fee leh zirna senso ba tam tak an awm tih a hria a, heng mite hnenah hian an scholarship thleng thuai se a duh a. Mizoram sorkar ngenna angin SNA SPARSH Model atanga Exemption (ngaihhnathiamna) chu Department of Expenditure-in tichhuak mahse Ministry of Tribal Affairs-in ni 31 Oct, 2025 hmaa Mizoram sawrkarin Mizoram Scholarship Board-in a lo hman thin SNA hmang tura hma a la lo a nih chuan kum 2023-2024 leh 2024-2025 chhunga Mizoram Scholarship Board hnuaia Scholarship zawng zawng hi lak theih a ni dawn ta lo niin a lang a, ZPM sorkar hi che rang turin kan phut a ni.

Central sorkarin sum a rawn sanction vek tawh si ZPM sorkar tihdik loh avanga Zirlaite hnena pek theih a la nih loh chungchangah MNF Thalaite chuan Mizoram Scholarship Board, Finance Department Mizoram leh Central sorkar Ministry of Tribal Affairs-ah te kan umzui mek a, Mizoram Sorkar pawh Zirlaite laka thupha chawi tur leh ekcheh thuta thu mai lova an thiam ang anga Zirlaite scholarship central sorkara kir leh tawh chu a lo chhuah leh vat nana tan la ve turin kan phut a ni. Heti taka Zirlaite leh an nu leh pate an mangan tawh laia Chief Minister leh a changtu Higher & Technical Education Minister-te “LO ZAWH LEM LEM” naa nuam an tawl hi kan dem takzet a. ZPM sorkarin heti tak hian Tribal Scholarship a tibuai tawh chung hian MNF Thalaite chuan kan theih ang ang in Central Sorkarah kan bawhzui ve zel a ni.