Zotlang mipuiin an veng tlangval Hriatrenga thlavang hauh; Silaia kaptu Rochhingpuia a na thei ang bera hrem an phut

Aizawl | Sept 12, 2025: Zotlang mipui chu vawiin chawhma khan an veng tlangval Lalhriatrenga Siakeng thlavang hauhin Aizawl District Court tualah an pungkhawm a, Silaia kaptu - Rochhingpuia a na thei ang bera hrem an phut.

Zotlang All NGO huaihawt punkhawmah hian Zotlang Local Council, YMA, MUP, MHIP leh MGYA bakah Bualpui Welfare leh silaimu tuar Lalhriatrenga Siakeng lehkha zirpuite an tel a, mipuite chuan pawikhawihtu Rochhingpuia chu a na thei ang bera hrem an duh thu an au rualpui.

"pawikhawihtu Rochhingpuia chu dan lova lo sumdawng thin leh ram pawn atanga ruihhlo tawlhru thin, kum 2015-ah pawh Central YMA ten an lo man tawh a ni tih an hriat thu an sawiin, hetianga thubuai lo nei tawh dan anga hrem ni lova, zalen taka a awm piah lamah khawlaia silaia tualthah a tum chu an rilru a na hle a ti a, vanneihthlak taka Lalhriatrenga a thih loh vang chauha tualthat lo mai chauh nia an hriat thu sawiin, court chu a phu anga rorel tura an duh thu leh bail-a a chhuah an remti dawn lo tih a sawi a, a lo chhuak leh a nih chuan a chungah engpawh thleng se veng mipuiten mawh an phur dawn lo tih an sawi bawk.

Tarlan tawh angin, August 29 zan khan Bawngkawna cheng mek Rochhingpuia hian Zotlang veng tlangval Lalhriatrenga Siakeng chu Bawngkawn vengah an intihbuainaah silaiin a kap a. Rochhingpuia hi man nghal niin Lalhriatrenga Siakeng chu Greenwood Hospital-ah enkawl mek a la ni a, investigation atanga an hmuhchhuah danin, a chuapah tui a tlin bakah a chuap a pan bawk a, ICU-ah la awm mekin, ventilator a la phawi ngam loh a ni.