Zaninah LESDE Mizo Idol 1st Round intihsiak zan hnihna, mi 26 an inlan dawn

Aizawl | Sept 24, 2025: LESDE Mizo Idol Season 8 neih mekah zanin hian 1st Round intihsiak zan hnihna neih a ni dawn a, mi 26 an inlan ang.

Zonet buatsaih LESDE Mizo Idol Season 8 intihsiakna neih mekah nizan atang khan 1st Round intihsiakna hi Zonet Studio-ah tan a ni a, nizan bikah khan mi 25 an inlan a, intihsiakna hi a hmunah Judge ten an thutchilh nghal a ni. 1st Round intihsiakna hi zanin hian chhunzawm a ni dawn a, mi 26 an inlan leh dawn a, intihsiakna hi zan dar 8-ah Zonet Zawlbuk, Zonet Youtube Channel leh Zonet Application Empai-ahte Live-a pek chhuah a ni ang.

LESDE Mizo Idol 1st Round intihsiaknaah hian Contestant-te hman turin Guitar leh Keyboard chhawp a ni a, 1st Round intihsiakna hi Zirtawpzan, September ni 26 thleng neih tur a ni. Ist Round intihsiakna atang hian Top 50 thlan chhuah tur niin, heng mite hian intihsiakna an hmachhawn hunah top 20 thlan chhuah leh tura ruahman a ni a. Intihsiakna hi top 10 atangin Mualpui-a R. Dengthuam Hall-ah neih a ni dawn a, Live Music hmanga intihsiakna hi neih tura ruahman a ni.

Puan tawh thin angin LESDE Mizo Idol Season 8 neih mekah hian Application form lak chhuah ngai lovin, Virtual Audition hmangin Augsut ni 15 atang khan mahni zai lai video theh luh theih a ni a, video theh luh theih hun tawp August ni 31 thleng khan mi 716-in an zai lai video an theh lut a, heng video luhte hi endik a nih hnuah tun thla ni 9 zan khan Audition result puan niin, mi 105 in First Round an lut a ni.

Mizo Idol Season 8-a pakhatna chuan cheng nuai 2 a dawn dawn bakah LBS Suzuki-in Scooty an pe dawn a, pahnihin cheng nuai 1 leh pathumnain cheng sing 5 an dawng dawn a ni.