Reiek-ah mimal enkawl ATM booth hawng

Reiek | Sept 24, 2025: Mizorama mimal enkawl ATM Booth 10-na tur chu vawiin chawhma dar 11:00 khan Reiek Chawhmeh Bazar building-ah Reiek VCP Pu Zothansanga'n a hawng.

Hawnna inkhawm hi Reiek VC Secretary Vanlalruata'n kaihruaiin UPC NEI Pastor Rev. Lalchuailova'n Hunserh a hmang a, Pathian hnenah ATM Booth hi a hlan a ni.

Hawnna thusawiin, Reiek VCP Zothansanga chuan Reiek khuain an mamawh em em ATM Booth an khuaah hawn a ni ta chu khawtlang aiawhin a buatsaihtute chungah lawmthu a sawi a, Reiek khua leh a chhevel mipuite bakah; Reiek khua tlawhtu zin miten an tangkaipui ngei a beisei a ni.

Thusawitu dang Mizoram Rural Bank Reiek Branch Manager Lalnunmawii chuan ATM Booth hawn thar chuan Bank dawr kawngah awlsamna a thlen ngei a rin thu sawiin, Khawtlang mipuiten tangkai leh dim thiam taka hmang turin duhsakna a hlan a ni.

Reiek ATM Booth enkawltu tur Hminghlupuii leh Vakrangee Kendra Master Franchisee Sellai Lalrinawma ten report an pe a, Vakrangee Kendra Pvt Ltd hi RBI hnuaia phalna nei niin tunah hian Mizoram hmun hrang hrangah ATM booth hawng turin an inbuatsaih zel a, ATM Card chauh ni lo QR Scan/GPay Scan pawhin pawisa hi ATM Booth atangin a lakchhuah theih tawh a. Eizawnna atana hmang duh veng leh khua tan ngaihven theih a nih thu an sawi.

ATM Booth hawnnaah hian Reiek VC member te, YMA, MUP, MHIP, MZP hruaitute bakah MzSRLM hnuaia Self Help Group member te an tel a ni.