YMA Inkhawmpui lianah, tun aia khauh leh awmze nei zawka ILP kalpui a nih theih nan Sawrkar-a thlen rel dawn!

Aizawl | Sept 10, 2025: Vawiin ni 10.09.2025 (Nilaini) khan YMA rorelna sang ber dawttu, YMA Central Coordination Committee ( CCC) vawi 103-na chu Central YMA Hall ah neih a ni a, rorel hi CYMA President Lalhmachhuana'n a kaihruai.

YMA Kumpuan atan rawtna pahnih - 'Ruihhlo Do' leh 'Ram leh hnam humhalh' te a lut a, thurel tur zingah, "tun aia khauh leh awmze nei zawka ILP kalpui a nih theih nan Sawrkar-a thlen," a tel bawk.

CYMA General Secretary Prof Malsawmliana'n Report a pe a, tunhnaia YMA hmalakna hrang hrang a tarlang a; palai kalte inhmelhriatirna hun a hmang.

October 21 - 23, 2025-a YMA Inkhawmpui Lian neih tura Agenda lut hrang hrangte thlitfim a ni a, hengte hi Agenda atan chhawpchhuah tura rel a ni.

YMA Khawih:

1. YMA inkaihhruaina leh nihphung leh hruaitute mawhphurhna rampumah inzirtira neih ni rawh se.

2. Mizoram chhunga hnamdang sumdawng, phalna nei lo tam ta lutuk hi titlem turin YMA-in hma la rawh se.

3. Mizo hmeichhia ten namdang pasala an neih zel loh nan Central YMA hian inzirtirna nasa zawkin kalpui rawh se.

4. Mizo Infiamna te chawisan a nih theih nan CYMA in hma la rawh se.

5. Zohnahthlak chi peng hrang hrangte Mizoram a chengte zingah chi bil hmalakna a awm tawh loh nan Central YMA in hma la rawh se

Sawrkar khawih:

1. Inner Line Permit (ILP) hi tun aia khauh leh awmze nei zawka kalpui a nih theih nan YMA-in Sawrkar-ah thlen rawh se

2. Tui hnar humhalh dan siam ni rawh se. (The Mizoram Water Source Catchment Area Protection Act & Rules)

3. Mizoram chhunga inkalpawhna kawngpui hrang hrang a chhiat avanga mipuiten harsatna kan tawk nasa lutuk thin hi a lo ziaawm theihnan Mizoram Sawrkarin tun aia chak zawkin hma la rawh se.

Kumpuan rawtna :

1. Ruihhlo Do

2. Ram leh hnam humhalh

Central YMA Budget (2025-2026) ruahmanna pawh Inkhawmpuia pharh tura pawm a ni.

He hunah hian Tuisual Group atangin Sakawrdai a Inkhawmpui Lian neih tur inbuatsaihna ngaihthlak a ni a. FCAA chungchanga YMA dinna inhrilhfiah a ni bawk. Branch YMA hrang hrang ten an huamchhunga member leh chhungkua chhinchhiahna Village Profile chungchang inhrilhfiahna hun hman a ni bawk.

CCC meeting ah hian Aizawl City Branch aiawh, Group leh Sub- Hqrs aiawh bakah Central YMA hruaitu mi 240 an kal.