PATHIAN HNENA THILPEK I PEK THEIH CHU

_Nun Atana Hmanrawn Bawm_

*PATHIAN HNENA THILPEK I PEK THEIH CHU*

- Rick Warren

- Sep 16, 2025

“Min zawng ang a, in thinlung zawng zawnga mi zawn hunah chuan mi hmu ang.” Jeremia 29:13

Mi hnena i thilpek theih hlu ber chu i hun i pek kha a ni. Eng nge a chhan? I hun hi i nun a nih vang a ni.

An lam i hawia, an mit ngeia i en phei chuan, i ngaihsaka an thil sawi turah pawh i rilru i pe hle tihna a ni.

Chu chu Pathian chungah pawh a tih theih - tawngtaiin a lam i hawi ang. Chung lam en rawh! Amah be turin i inpeih a ni tih lantir rawh. Kun emaw maimitchhinga tawngtai hi tha viau mahse, Bible-ah chutiang chu a inziak lem lo a ni. Kei chu maimitchhinga ngawi renga ka awm chuan ka mut a chhuak thuai zel. Chu ai chuan, chunglam hawia, ring taka tawngtai hi ka duh zawk a, ka taksa hian Pathian lam a hawi a ni tih a tarlang nawna ka hriat vang a ni.

Daniela ngei pawhin Pathian a mamawha, finna a mamawh chuan chutiang chuan a ti thin a ni, “…tawngtaina leh dilna zawngin Lalpa Pathian lam chu ka hawi a.” Daniela 9:3

Pathian chuan amah zawng turin min duh a - chutiang ti te tana thutiam chu Bible-ah tam tak kan hmu a ni:

*“Mi zawng ula, in nung ang”(Amosa 5:4).* Pathian chu i zawn ngar ngar chuan, nun dan tak tak  i zir tihna a ni.

*“Mi hmangaihtu chu ka hmangaih a, thahnemngai taka mi zawngtute chuan mi hmu ang”(Thufingte 8:17)* Pathian zawnna lamah harsatna i neih chuan, zawn dan dikin amah chu zawng la - ama hnen atang chuan thil beisei chauh neih  lo vin, amah hriat chu tum ang che.

*“Min zawng ang a, in thinlung zawng zawnga mi zawn hunah chuan mi hmu ang.”(Jeremia 29:13* I nunah harsatna a lo thlen pawhin; i hun awlah chauh ni lo vin, Pathian nena hun hman chu i dah pawimawh ber chuan amah chu i hmu ang.

*“Pathian hnena lo kal chuan, a ni chu … lawmman pek hmang a ni tih rin tur a ni”(Hebrai 11:6)* I sumdawnnaah te, sum leh paiah te, inlaichinnaah te leh i hmalam hunah Pathian hnen atangin lawmman dawn i duh em? Amah chu zawng ang che.

*“Ama ram zawng zawk rawh u, tichuan chung thil pawh chu a pek belhchhah dawn che u nia”(Luka 12:31)* Pathian i zawn hmasak chuan, thawpikna te leh lungngaihna te pawh i nei tlem dawn a ni. 

Pathian lamah inpe la. A lam hawi la, amah chu a hmasaberah i dah a ni tih lantir ang che.

Ngaihtuah zui atan

* Miin i rilru zawng zawng an pek che hian danglamna awmin i hria em? I hun hmanpui ten nangmah an en loh chein engtinnge i ngaih?

* Pathian lama rilru pek tlat hian engtinnge i hmalam hun leh i thil ruahman atan hian thlirna dik a pek che?

* Engvangin nge Pathianin amah zawng turin min duh?

*[Lettu: Sangpuia]*