MIZO KRISTIAN TALIBAN KAN NI TA EM NI?

- Dr C Lalrampana

India ram hi sakhaw zalenna ram ropui leh hnam inpumkhatna vawnghimtu ram lian leh ropui ber a ni. India danpui Article 15, Part III; 119 Part III; 25 Part III; 26 Part III; 27; 28; 32 Part III-te kan en chuan mimal tinte sakhua humhalhsak kan ni. Dikna chanvo thuhmun nei vek kan ni bawk. Hetih lai hian Mizorama Kristian-te hian salhaw zalenna leh fundamental rights kan neihte hi inbawhchhiatsak leh inpalzutsakin Muslim firfiak Taliban-ho ang maiin sakhaw dang leh Kohhran pawl dangte kan ngai thei lo thin niin a lang a, All NGO hminga Joint signature hmanga invaubeh, invau khan leh inrikrap thawm hriat tur a awm fo mai hi a pawiin a tha lo takzet a, hnam impumkhatna tichhetu a ni a, a tha lo takzet a ni. India ram puma remna thuthlung (ref. Peace accord 1986) tihlawhtling bertu kan nih lai meka hetiang boruak a awmleh thin hi a pawi takzet a ni. Tun tuma Thuampui All NGO Coordination Committee-in Evangelical Baptist Convention Church EBCC Kohhran, Thuampui Secretary hriattirna an thawn a, an ngenna (ref. 01/09/2025) hi thil tha ni awm taka lang, tha hauh si lo niin a lang. Chuvangin, a sawhkhawk tur ni thei awm lo lang ta nen hian lo thlir teh le:

ZALEN September 4, 2025 : Thuampui All NGO Co-Ordination Committee chuan Evangelical Baptist Convention Church EBCC Kohhran, Thuampui Secretary chu hriattirna an thawn a, an ngenna an zawm lo a nih chuan YMA Member nihna hlihsak, MUP member hlihsak, MHIP member hlihsak, Chhiatni Fund pek let leh Invuina atan Thlanmual hman theih loh an nih tur thu an hriattir.

Thuampui All NGO Co-Ordination Committee chuan a hnuaia mi ang hian lehkha hi an thawn a ni.

Kan khawtlang lungrual taka kan chenho lai leh Zohnahthlak inunau leh pumkhat taka chenho kan duh laiin inpumkhatna leh lungrualna tichhe thei hnam bik sakhua (Kohhran) in din a, pawl hran in siam hi Thuampui branch YMA Committee chuan din lo turin a ngen tawh che u a. Tin, Local Council, YMA, MUP, MHIP join committee pawhin din lo turin a ngen tawh bawk che u a ni.

Khawtlang hruaitute ngenna pawisa lo leh Zohnahthlak impumkhatna atan Duhlian tawng hmang uar tura kan inzirtir mek laia hnam bil tawng hmang Sakhua/Kohhran indin a, ram leh hnam impumkhatna tichhe thei zawng leh huho hran (pawl hran) in siam luih tlat hi Thuampui All NGO Co-Ordination Committee chuan a dem takzet che u a. September 10, 2025 ral hma a khawtlang hruaitute ngenna in zawm thu hriattir kan nih lova, hma in la chhunzawm zel a ni chuan a hnuaia tarlan khawtlanga in chanvo (nihna) hi in Kohhran member zawng zawng hlihsak in ni ang tih ka hriattir a che.

Thuampui All NGO Co-Ordination Committee aiawh hian Secretary chuan hming a sign a ni.

OPEN LETTER AND WARNING TO PU DARTHANTHUAMA, CHAIRMAN, ṬHUAMPUI ALL NGO CO-ORDINATION COMMITTEE & PRESIDENT YMA, ṬHUAMPUI.*

CC: Ṭhuampui YMA, MHIP, MUP, Meithai Association, Mistiri Association, Ex-Servicement, Florist Association._

Ka Pu,

Engkim ti thei leh Kohhran neitu i do tlat Pathian hmingin chibai aw. Ngawi renga thlir liam mai kan tum laiin August 27, 2025 a in siam chawp NGO intelkhawm hmanga Pathian Kohhran mai ni lo, 'Paite Ṭawng' i huatna i lanchhuahtir tih kan lo hria a, mak kan ti hle. September ni 10-ah eng thil nge thleng ang aw tiin kan lo ngaichang reng a; September ni 10-ah engmah thu thar hriat tur a awm loh laiin September 11-ah inlak hran tum loh vânga YMA ni lo pawl dang din pawh tum lova kan mi leh sa in veng chhunga awmho an member nihna hlihsak a, chhiatni fund in pêk let thu kan lo hria a, inpumkhatna duh lo i ni tih kan hrechiang thawkhat tawh.

I hmalak dan ṭha i ti tak tak a nih chuan, September ni 20 hma ngei hian he 'open letter' lo chhang let ve la; chhânna ṭha tawk kan dawng lo a nih chuan Lamka-ah hma kan la ṭan ve dawn tih lo hria ang che.

September 20 hnuah Lamka a awm, Lusei/Duhlian ṭawng hmang awmna Biak In & Dawr zawng zawng hi khar tura thu pêk an ni dawn a, zawm lo erawh ṭha kan tih ang angin hma lak kan tum ve a ni. Chibil Kohhran pawh ni lo, Paite ṭawng hman vanga ringawta kan mi leh sate tuarna hi kan en liam mai mai dawn lo. Pathian chunga thuneitu anga ro i rel avangin keini pawhin dan chunga thuneitu angin hma kan la ve dawn tih kan lo hriattir nghal e.

Tun thleng hian Lamka Group YMA pawhin thuchhuah an nei lova, Lamka a YMA a awm ve luklak hi thil ṭul lo tak a nih bawk avangin YMA member ho pawh an him dawn chuang lo. Lamka a ṭawng tam ber Paite ṭawng a ni a, YMA member zawng zawng pawh Young Paite Association-ah an awm tûr a ni. Keini erawh chuan YPA a awm duh ni lovin, awm duh lo zawng zawng zirlai pek kan tum bawk tih lo hria ang che.

History sawi tam vak kan tum lo. Paite i huat êm êm ho hian eng nge kan tih theih ve tih i hriat hunah a tlai tawh dawna, chuvângin September ni 20 hmaa i hmalak dan leh a chhan ṭha tâwk lo sawi ve turin kan rawn ngen nghal bawk. Khawtlang ṭhatna tur tih chhiat tum pakhat mah kan awm loh laia Biak In hmanga hma i lak hi tuma'n kan hrethiam ngai dawn lo. Thil duhawm lo a thlen hnuah erawh insawi fiah kan pawm dawn lo bawk. Tin, i hming leh nihna zawng zawng pawh kan hre vek a, i chunga eng emaw thil thleng a awm chuan i tuh rah sengah i inngai mai dawn nia.

Atawp ber atan, Paite do tura pawl in din chawp hi beng sikin lo ngaihtuah leh la; Paite ṭawng hmanga Pathian biakna i do tlat hi Paite ṭawng i huat vang chauh a ni tih kan pawmdan a nih avangin Lamka a Lusei/Duhlian tawng hmanga inkhawmna awm zawng zawng chunga thil duhawm lo a thlen loh nan ni tlemtê hun i nei. I chhânna azirin hma kan lo la ve ang.

By: Lalramhmangaiha”

Lamka

Behind the Truth' BTT

https://whatsapp.com/channel/0029VaYCqe71yT229xZ6f42y

He invautawnna lehkha hian rah tha lo leh dinhmun hlauhawmah min dintir mek niin a lang. Hmanni lawkah kan ‘chhin’ unaute inkarah inkahna rapthlak tak a thleng a, inrem turin hma kan la zo hlim deuh chauh a, meitei leh zo kuki inkara indona tha lo tak leh hlauhawm tak awm mek aia tha lo lehzual leh hlauhawm tak chibing inbeihna rapthlak tak chhuak mai thei thil hi tihtawp vat a nih theih nan Mizoram sawrkar leh Central YMA hian a rang thei ang berin hma la nghal va vat se a lawmawm ngawt ang.

Mathaia 5:9

"Remna siamtute chu an eng a thawl e; Pathian faa vuahin an la awm dawn si a.

Thil pawi a thlen hmaa thelh mih a nih loh chuan a pawi tawh hnuah chuan inchhir a sawt tawh lovang. Chuvangin, sawrkar a chet vat vat a hun e.

[Join WhatsApp channel for updates- https://whatsapp.com/channel/0029Vb66gtL8KMqnoM2JIz12 ]