NH 306 & 06 thawmthat hna chak zawka kalpui dan tur sawiho; Chhuanlam siam chuan tawp hun a nei dawn lo, a taka hmuh theiha thawh a ngai tawh

Kolasib | September 4, 2025: Vawiin chawhnu khan Kolasib District tan tlang National Highway 306 & 06 a Kawngpui thawmthat hna kal mek chu chak zawka kalpui a nih theih nan Deputy Speaker Lalfamkima hovin Kolasib DC Conference Hall-ah thutkhawmna neih a ni a. He hunah hian Kolasib DC Robert C Lalhmangaiha, Addl DC B Malsawmtluangi, NHIDCL General Manager Binod Kumar Srivastava leh NHIDCL contractors te, Jt VC aiawhte leh P&E, PHE, Forest leh Sawrkar Department thenkhat aiawh sawm bikte leh DC Office a Officers te an tel.

Thutkhawmna kaihruaitu Lalfamkima chuan NHIDCL aiawh kalkhawmte hnenah chuan hun rei tawh tak atanga kawngpui that hleih theih loh avanga mipuite tawrhna te sawichhuakin kawngpui tha neih theih nan theihtawp an chhuah a tul tak zet tawh a ni, a ti a. Ram leilung dinhmun pawh hman atanga hriat tawh a ni tiin, tuna chhuanlam atana siam a ni leh thin chu a pawi a tih thu a sawi a. Chhuanlam siam chuan tawp hun a nei dawn lova, chuvang chuan a taka hmuh theih a an thawh a ngai tawh a ni, a ti.

Deputy Speaker chuan Kolasib District hmun hrang hrangah kawngpui motor tan a zawh tlak loh khawpin a awm a, heng siam nan hian hun an pawhsei zel chuan working season chhungin hnathawk hman lovin an awm leh dawn a, chuvang chuan a theih anga a tul ang ang te bawhzui rang turin NHIDCL aiawhte chu a hriattir a. NHIDCL thawktute telin a hma thei ang ber a ama hova kawng en a thawh chhuah ni se a ti bawk.

He thutkhawmnaah hian NHIDCL atangin NHIDCL General Manager BK Srivastava chuan National Highway 306 & 06 kawngpui thawmthat hna kal mek a hmalakna te a tarlang a. Helai kawng dinhmun a that theih lohna chhan point hrang hrang tarlangin chungte chu; lei chhung atanga tui lo put te, motor overload a tlan thin te, kawng siam tirh a lung chang tha nilo leh material tha tawk lo hman te leh chhan hrang hrang avanga kawngpuia tui tlingte an ni ber a ni, a ti a. Hemi chungchang enfiah turin leh a chhiat zualna zirchiang turin CRRI team an lokal anga chumi te zirchianna report pek a zirin an hmunpui lam atangin kawng siam zelna tur sum pawh an rawn pe chhuak dawn a ni, a ti. Kawngpui thawmthat hna contractor 5 ina an kalpui mek erawh a kal chhunzawm zel anga, a chhe zual lai zirchianna chu CRRI survey ina a huam tur a nih thu a sawi bawk.

He thutkhawmna ah hian Kolasib DC Robert C Lalhmangaiha chuan NHIDCL aiawhten an hmunpui lama an thawn tur, kawng chhe zual te siam that nana DC office atanga lehkha ziah ngai te a awm anih chuan hrilhhriat turin a chah a. An kawng siam tum dan leh hnathawh dan tur work schedule pawh Deputy Speaker hnena submit a, a copy DC Kolasib a thawn ve turin a hriattir bawk. He hunah hian P&E leh PHE aiawha kalkhawmte pawh in an harsatna te thlen in a tul anga bawhzui tura NHIDCL hotute chu hriattir an ni bawk a ni.

He hunah hian NH 306 & 06 thawmthat mek chungchang bakah EPC contractors ten 4 lane kawngpui an laih mek te leh NHIDCL leh State Sawrkar Department thenkhat inkara sawi tlan ngai te sawihona neih a ni bawk.