Maria CT Zuali leh Kei

- Michael Lalmanzuala

Maria CT Zuali (Maria) chu a hnuaia thawkten an hêk avangin a hna chelh lai, Director, Commerce and Industries aṭangin sawn a ni ta a. Hei hian social media lamah te sawi a hlawh hle mai a. A chanchin kan hriat dan leh kan ngaihdan kan han sawi ve dawn a ni.

Maria hi taima tak leh chak taka hnathawk mi a ni a. A hnuaia hnathawkte pawh chutiang ni tura beisei mi niin, hnathawhna lama dâwngdah ngaithei lo tak a ni.

An hêkna thu langsar ber chu office room-tea CCTV a dah vang niin an sawi a. He tiang tih ṭul a tih chhan chu hnathawh huna hnathawktute dawngdah taka an awm ṭhin vang leh office chhuahsan mai mai ṭhin te an awm vang a ni a. Chu tiang mite chu thununa, hremna pawh a ṭul ang anga pêk a duh vang a ni. Hetiang a tih theihna chhan chu hun vawng dik mi a nih vang leh dan bawhchhe ngai lova, dan bawhchhetute chu an phû tâwk hremna pe tura dan kenkawhna lama a huaisen tawk vang a ni ang.

‘Maria CT Zuali leh Kei’ ka’n tih kherna chhan hi kan tawnhriata inanna kan neih ṭhin vang a ni. Ka sawi fo tawh ṭhin angin kum 40 zet sawrkar hna ka thawh ve chhunga vawi khat mah office tlai ngai lo, official thilah lo chuan office hun chhunga chhuak mai mai ngai lo ka ni a. Mahni inthunun thei chuan midang a thunun thei a, mahni inthunun thei lo chuan midang a thunun thei lo, tih thu dikzia lantirna ni ngeiin Chief Secretary ka nih chhung khan sawrkar hnathawk office kal tlai an awm ngai lo va; office hun chhunga chhuak mai mai an awm ngai hek lo. Picnic te thlengin kan khap vek a ni. Mimal thil, mitthi vui, inneihnaa kal atan chuan sawrkarin casual leave kum khat chhunga ni 12 zet a pek hi hman mai tur a ni.

Mahni eizawnna hna, ‘Duty’, rinawm tak leh ṭha taka thawh hi a pawimawh ber a. British-te phei chuan duty tihna lamah chuan thih huam tur an ti a; Duty ngaihthah chu corruption nasa takah an ngai a ni. Chu tiang bawk chuan Prof. Sangkimi chuan sawrkar hnathawk kohhran upa ni bawkin, casual leave pawh la lova, a duty kalsana inkhawmpuia a kal chuan, ‘time corruption’ a ni a; a duty hun pawimawh tak kha a ‘rû’ a ti a ni.

Maria-in hun vawn dik leh vawn ṭhat a ngaih pawimawhzia a taka a lantir hi he tiang lama entawntlak leh ngaihsanawm a nihzia lanchianna a ni. Dikna leh Huaisenna hi kalkawp tlat, ṭhen hran theih loh a ni a. Mi dik chu a huaisen a; mi huaisen chu a dik nge nge ṭhin, tih thu rawn nemnghettu a ni ngei ang.

Inneihna-a kal tur te, mitthi vui tur te, mitthi râl tur te-a office chhuahsan ṭhinte, “mi fel” kan la ti tlat ṭhin te hi kan ‘values’ kan tihdanglam tur te zinga pawimawh tak a ni tih te hi kan hriat a hun tawh khawp mai. Ngaih pawimawh tur aia ngaih pawimawh loh zawk tur kan ngai pawimawh zawk tlat ṭhin hi, kan kalsualna leh kan hnam ṭhanmawhbâwk lian tak a ni.

Pawisa eirûk leh thamna lâk corruption laka fihlim kan nih avangin sawrkar hnathawk hrang hrang, sawrkar pawisa Cheng Vaibelchhe 65 zet lo ‘eiru’-tute chu, an lo eiru ngei a ni tih kan finfiah aṭanga chawlhkar khat chhungin an pawisa eirukte chu ‘Govt. Account’ -ah kan dah luhtir vek a. Chu mi hnu-ah cashier-te chu ni tin an pawisa hman bang treasury-ah kan dah luhtir vek a. BDO, AO leh sawrkar pawisa dawng ṭhin dangte pawh chawlkar khat chhungin an pawisa dawnte chu chawlhkar khat chhungin kan dah luhtir vek bawk a. Chief Minister tan pawha pawisa fai eirûk theih miah lohvin kan dang char a ni.

Pawisa eiruk theih loh boruak chu hruaitute leh sawrkar hnathawkte pawh chuan rit an tiin khawharthlak an ti a ni ang, kum khat êm pawh ka thawh hma khan Chief Secretary hna aṭang chuan min sawn tawp mai a ni. Chu chu Maria an sawn chhan pawh hi ni ngeiin ka ring. Insawifiah theihna hun pawh pe lo leh, ‘enquiry’ pawh la miah lo va, hêkna avang ringawta, sawrkarin a chunga ‘action’ a la mai hi hriatthiam har tak chu a ni. ‘Rule of Law’ te, ‘Right to be Heard’ te hi kan sawrkar hotute dictionary-ah te hian a lo awm ve lo em ni ang le? (The right to be heard is a fundamental legal principle that ensures individuals have the opportunity to express their opinions or concerns before decisions are made that could affect their rights or interests. Originating from the Latin maxim "audi alteram partem," which means "no one should be condemned unheard," this right is considered essential for fairness in legal processes.)

Maria an dahna ‘post’ hi hna pawimawh lo ber te zinga mi niin an sawi a. Chawlhkar khat chhunga ‘file’ pakhat bâk khawih tur awm lohna niin an sawi ṭhin. Chu ti a nih chuan Maria posting hi ‘punishment posting’ anga ngaih theih a ni ang a. Chu chuan a chunga kan sawrkar thiltih dan hi dan mit aṭanga enin a tizahawm lo lehzual dawn a ni. Mizote hi ‘intihhmuh ching hnam’ kan nih thu kan sawi fova. Maria hêkna he ti taka a hlawhtling hian ‘association’ dangte zingah ‘inhêk huaisarna’ a rawn thlentir ang tih a hlauhawm bawk a ni.

Sawrkar dan kalh leh mihring nunphung pangngaia tih loh tur, ti tura PC Sawrkar Chief Minister-in vawi tam tak min tih, ka tih duh loh vanga, ka deputation period tawp hma lehnghala, Home Ministry thupek kalha, min chhuahtir ṭum khan Punjab sawrkarin Corporation thi lek lek, Punjab Poultry Development Corporation Managing Director-in min dah a. General Manager, Sales Manager, leh Driver 27-te ṭanhona corruption khâwl chu ka titawp nghal a. Thlaruk chhungin corporation intodelhah ka siam a; kum khat chhungin corporation ṭhangduang takah ka siam a ni.

Sangha hi kan rama dîl te leh tuikhuah te hmang ṭangkaia awlsam tê-a kan intodelh theihna a ni a. Maria pawh hian he hna pawimawh lo tak anga lang, pawimawh tak si-ah hian a taimakna, remhriatna leh huaisenna hmanga kan ram leh hnam tana hna pawimawh thawh chhuah nana hmanga, SANGHA-A INTODELH-a min siam ka beiseiin ka duhpui bawk a ni.

Rev. Thansiama khan kan sawrkarte hian naupang inkhualtelem pawh an tluk lo, a ti a. A chhan ka zawh chuan, ‘Naupang inkhualtelem te chuan dan an nei a, an dan an zawm ṭhin. Kan sawrkarte erawh chuan an dan siam ngei te pawh an bawhchhe fova, mumal lohna khawvelah an chêng’ tiin min chhang a ni. Chu chu kan sawrkarte nihna dik tak chu a ni a. A zual zapui vailen hlo, an tih ang hi an ni chho zel mai a nih ber hi.

P.S.

Maria chu hna dangah an sawn leh hman tawh niin kan hria a. A hna tharah pawh dik tak leh huai taka thawka rah ṭha tak a thlen ngei kan beiseiin kan duhsak a ni.

Thu belh:

1. Sawrkara a hnârkaitu, Minister te hi rilru leh an thil tihah an puitlinzia a lang tûr a ni. A dept.-a scandal, a awm chuan pa ber a nih angin ṭan lam leh huat, duhsak loh lam nei anga lang tûrin action a la mai tûr a ni lo. Vawiina a lam ṭang nia a ngaih kha a thu azirin amah beitu an ni thut thei. Chuvângin thu inchuh, rêng rêngah a rilruin ṭan lam a nei a nih pawhin ngaihbel theih tûra Action la mai lova inremna mual a zawna, chumi anga Action a lâk loh chuan a dept. chhungah a thunun phâk loh thil a thleng palh thei ang. Maria thlâktu Officer hi a engamaha hmain he dept.-ah hian "Hard choice" neiin a rawn awm nghâl ta tlat mai a, tihdam harsa tak, rilru lam thlenga natna tûr hi Minister hian a siam ta phawt a ni.

2. He tianga ualau leh ngaihzâwn theiha Minister-in thil a ti mai hi 'puitlin lohna lantîrtu' anga ngaih theih a ni. Officer-in thil tihsual, misbehaviour, defalcation (sum khawih chingpen) etc. a neih chuan Rule of law hmanga Sawrkar hi rorel a nih avângin, 'A right to be heard' (thiamthu sawi) hun siam ngei ngei tûr a ni. Sawrkar hnathawkte hi khawi hmunah pawh sawn theih an ni a. ‘Transfer as punishment’ hi Court lamah dingchang kher lo mahse, Mizoramah pawh 'Instrument of punishment' anga leklam hian Political Fallout a nei duh hlê tih kan hmu nual tawh a, lam ṭang nei leh lamṭang siam zawnga Sawrkar bera hmuh a nih chuan a rawn khen lêt (political repercussion) hi hi chhût ngawt ai hian a na thei viau a ni.

3. An Minister nih dawna an thutiam (oath of office) kha..."I will do right to all manner of people in accordance with the Constitution and the law, without fear or favour, affection or ill-will," tih kha mi zawng zawng chungah duhsak bîk leh huat bîk leh thlei hranna nei lova thawk tûra an thutiam a ni a. Party mite duhsak neih tum vânga Departmental Works siam chiam te phei hi chu Court rorelna rim a nam thei tih kha hre reng teh se.

4. ZPM Sawrkar hi mipui beiseina a sân teh lul nên, tûnah chuan ziaktu pakhatin, "You cannot teach a pig to sing. You just waste your time and it annoys the pig," a lo tiha vawk dinhmunah hian an awm ta ni berin a hriat ta. Duhsaktute ziak leh sawi aṭang te hian finvâr hawk na tham chu a awm tawh asin maw le!

[Join WhatsApp channel for updates- https://whatsapp.com/channel/0029Vb66gtL8KMqnoM2JIz12 ]