MTM-in Lunglei-ah 'Mizoram Vision Seminar' buatsaih

Aizawl | Sept 13, 2025: Mizoram Transformation Movement (MTM) hruaitute chuan nimin khan Lunglei Press Club ah 'Mizoram Vision Seminar' an nei a, Mizoram hi tun atanga kum 25, (2050) ah chuan 'Ram intodelh, hmasawn leh Pathian tih ram' nih ngei kan tum a tul thu sawi a ni. He hunah hian FCAA -2023 sawihona hun hman nghal a ni a. Seminar ah hian pawl hrang hrang hruaitute leh sawm bik mi an tel tha hle.

Mizoram Transformation Movement (MTM) hi Joint Civil Society of Mizoramm (JCM) a tel pawl pakhat niin JCM in FCAA, 2023 kan ram tana a thatlohna khaw hrang hrangah inhrilhfiahna hun hman zel a nih tur bawhzuiin FCAA 2023 chungchang sawihona hi hman a ni a. FCAA, 2023 hi Central in Mizoram pumah project pawimawha a puan te forest clearance ngai tawh hauh lova duh duh a hma lak theihna a ni a, a hma a Tlawng hnar lama hmalak phal loh thin te, Zopui tlanga Radar dahte pawh sawrkarin a duh chuan phalna ngai hauh lovin, dal rual lohin hma a lak theih tawh tur thu sawi a ni.

MTM chuan ATL Road ah Aizawl to Thenzawl chu a kawng a ziaawm hle laiin Thenzawl to Lunglei chu kawng a chhe hle tih kan hmu a. Tlawng to Pukpui kawng hmun thenkhatah phei chuan kawnglaiah tui tam tak, lui ang maiin a luang a. kawng that ngaihna a awm lo tih a lang a, a chhiat zual zel a hlauhawm hle a ni.

Hetianga tui a luan loh nan side drain hi pawisa tam tak pawh sen ngai lovin JCB hmangin hai fai thuai turin kawng enkawltu Sawrkar leh Department te kan phut a, hei hian ATL road siam that a nih hma pawhin a chhe lehzual tur a ven a beiseiawm a ni.

[Join WhatsApp channel for updates- https://whatsapp.com/channel/0029Vb66gtL8KMqnoM2JIz12 ]