Mizoram hi ramhmul damdawiin an ngeih - humhalh nachang kan hriat a, ram danga thawn chhuak thei khawpa kan chinpun hunah, nasa takin hma kan sawn dawn ~ Health Minister

Aizawl | September 23, 2025: Health & Family Welfare Minister Lalrinpuii chuan vawiin khan Vanapa Hall-ah National AYUSH Mission, Mizoram buatsaih, National Ayurveda Day 2025 lawmna hun chu khuallian niin a hmanpui. Kumin hi National Ayurveda Day lawm a nih tan atanga vawi 10-na niin, thupui atan, ‘Ayurveda for People and Planet’ tih hman a ni.

Khuallian Lalrinpuii chuan thu sawiin, Ayurveda chu natna enkawlna mai ni lovin nunphung chi khat a ni a, a thu ril ber chu hriselna vawnhim a nih thu leh tunlaia nunphung hrisel lo avanga natna pung zelah a la pawimawh zual zel dawn a ni, a ti a.

Health Minister chuan Mizoram leilung, sik leh sa leh ruah tui tlak dante chu thing leh mau, thlai leh ramhmul damdawi chi hrang hrangin an ngeih em em a. Heng ramhmul damdawi tangkai tak takte hi, humhalh nachang kan hriat a, ram danga thawn chhuak thei khawpa kan chinpun hunah phei chuan, nasa takin hma kan sawn dawn a ni, tih a sawi a.

Minister chuan AYUSH doctor leh staff, co-located AYUSH facilities-a thawk mek te, Integrated AYUSH Hospital-a thawk te leh AYUSH Health & Wellness Centre 41-a thawk mekte chungah lawmthu sawiin, Ayurveda chu India-in mihringte hnena a thilpek hlu tak a ni a, Ayurveda hmanga hriselna chu mi tin tan a ni a, hrisel taka nung duh apiang tana belhchian tlak, Ayurveda chu chawilara a awm zel a beisei thu a sawi bawk a ni.

10th National Ayurveda Day 2025 lawmna hunah hian Health & Family Welfare Department Commissioner & Secretary H Lalengmawia, IAS in kalkhawmte lawmna thuchah sawiin, AYUSH chu sawrkar laipui pawhin a ngaih pawimawh avanga Ministry puitlinga din a nih thu a sawi a. Ayurveda chu a hming avangin Mizote’n ngaina lo mah se kan thlahtute atanga kan ban phaka inenkawlna awm, ramhmul damdawi hmang thin kan ni tih sawiin, a thatzia inhrilhhriat a tul thu a sawi.

Mizoram State Council for Indian System of Medicines (MSCISM) Registrar Dr V Malsawmpuii chuan Ayurveda chungchang hmelhriattirna thu sawiin, Civil Hospital, Aizawl AYUSH, Medical Officer Dr Laltlankimi Ralte, leh Lengpui CHC AYUSH Medical Officer Dr. VL Remruati te atangin case presentation ngaihthlak a ni a. Health & Family Welfare Department Principal Director Office Joint Director (Planning) Dr. Zonunsiama'n lawmthu sawiin hun a khar a ni.