Home Minister K Sapdanga'n Edenthar veng-a kawng siam dan tur en, Model school atana a thlan Govt Primary School a tlawh bawk

Aizawl | Sept 23, 2025: Vawiin September 23, 2025 (Thawhlehni) chawhma khan Home Minister K Sapdanga'n a bial chhung Edenthar vengchhung inkal pawhna kawngpui siam dan tur a en a, AMC Ward No VI Corporator H Lalremtluanga, EE PWD Road North Division, SDO, JE, Edenthar LC leh ZPM Unit hruaituten an tawiawm.

K Sapdanga chuan, "Edenthar vengchhung kawngpui chhe lutuk chu a rang thei ang bera siam turin ruahmanna siam mek a nih a ni a, PWD lam pawh a theih ang angin ka lo bawhzui zel dawn a, veng mipuiten an nghahhlelh thu pawh ka hria a, siam hma ngeia PWD hotute nena rawn en hi tul ka ti a, Edenthar vengchhung kawngpui hi siam thuai a nih theih nan chak takin kan bawhzui zel dawn a ni," a ti.

Hemi rual hian Govt. Primary School pawh tlawh nghalin Sapa chuan, "Ka bial chhungah Education Department lamin model school thlang turin min ti a, Mizorama Govt. Primary School zinga zirlai ngah ber Edenthar Primary School hi ka thlang a, he School hmasawnna tur hian theih tawp chhuah zel ka tum a ni. Zirtirtute, Local Council leh kan Party hruaituten zirtirtu in indaih loh thu min hrilh a, a hmun ngeiah a takin ka rawn hmu bawk a. Kum khat chhung atan zirtitirtu pahnih rawihna tur ka MLA Fund atangin kan ti ang a, zirna pawhin hma a sawn phah ngei ka beisei tlat a ni," a ti bawk.

Aizawl North III Bialtu MLA K Sapdanga hian tunah hian Govt. Electric Primary School II ah zirtirtu pakhat a fund atangin a ruai mek a, Edenthar Primary School-ah pahnih a rawih leh chuan a bialchhungah zirtirtu pathum a ruai dawn ta a ni.