"Chhiah kan chawi ṭhin hi nasa takin a tlahniam," - "Mamawh kan neih phak ngai lohte kan neih theih phah tawh dawn," ~ K Hrahmo

Aizawl | Sept 23, 2025: BJP Mizoram chuan vawiin khan Aizawl Press Club ah GST chungchangah thuthar thehdarhtute an kawm a, MLA K Hrahmo chuan, "Chhiah kan chawi ṭhin hi nasa takin a tlahniam," a ti a, "Mamawh kan neih phak ngai lohte kan neih theih phah tawh dawn," a ti bawk.

Kan hriat ṭheuh angin India ram Prime Minister zahawm tak Pu Narendra Modi-an kumin Independence Day speech-a a sawiah khan GST Next Generation reform kalpui a nih tur thu a lo puang tawh a nih kha.

Chumi bawhzuiin kumin 2025, 22nd September aṭanga hman ṭan GST Next Generation Reforms 2.0 chu chhawp chhuah a ni a, a lawmawm hle a ni.

India ramah hian Chhiah (tax) hi chi hniha ṭhen a ni a, Direct tax leh Indirect tax-te an ni. Direct tax chu mipuiin Direct taka sawrkar hnena chhiah kan chawi hi a ni a (Eg- Income tax, professional tax etc). Indirect tax erawh Mipuite'n kan thil lei leh hralh aṭanga Dawr neitu te kal tlanga Sawrkar hnena chhiah kan chawi hi a ni.

Mipui ten thil kan lei reng rengin GST kan chawi tel zel ṭhin tih hi kan hriat a pawimawh hle. Dawr ah kan lei emaw online-in kan chah emaw tax invoice kan en chuan kan GST chawi zatte a hmuhtheih a, mipui nawl pui te'n hei hi kan hriat a pawimawh takzet a ni.

Tuna kan sawi tur tak GST 2.0 tia kan hriat hi Prime Minister Modi-an mipui nawlpui nitin mamawh, lei leh hralhna ah harsatna an tawh thin ti zangkhai tura hmalakna pawimawh tak a ni. India ramin Kum 2047-a Ram Intodelh/ Ram Hmasawn (Viksit Bharat-2047) nih a tumna kawng pawimawh tak pakhat, huapzo hmasawnna, a te ber aṭanga a lian ber thlenga hmasawnna tluantling a thlen theihna tura kailawn pawimawh tak a ni.

He Tax rate tihhniamin a tum lian ber chu mipui nawlpui ban phak leh man man zawka lei theih tura thil man siam ṭhat a ni a, sumdawngte'n a man an ti hniam ngei tur a ni a, nimin September Ni 22 hnu lama chuan GST rate tihhniamna bungrua leh tha (service) zuarte zingah a man tihniam lo report lut a awm chuan dan angin action lak theih a ni tawh ang. Old stocks pawh rate thar angin an kalpui tawh tur a ni a, chuvang chuan mipui nawlpuiten kan hriat chian a pawimawh a, a man tur dik taka bungrua leh tha (services) te leia kan hralh theihna turin kan dikna chanvo kan hriat a tul takzet a ni.

Next Generation GST reform (GST 2.0) aṭanga hlawkna kan dawn point thenkhatte:

1) Chhiah kan chawi ṭhin hi nasa takin a tlahniam :- Nitin mamawh (Essential commodities) ah nasa takin chhiah (GST) a tlahniam a, natna khir tak tak entir nan Cancer enkawlna damdawi angah tax peka ngai tawh dawn lova. Hei hian mi rethei leh harsa zawkte a pui nasa dawn a ni.

2) Mamawh kan neih phak ngai lohte kan neih theih phah tawh dawn:- Tax reform chuan mipui nawlpuite'n thil kan awh leh neih chak em emte, nei thei dinhmunah min din tir tawh dawn a ni.

3) Loneitute tana malsawmna a ni:- Lo neitute tan a hnathawhna puitu khawl,

Tractor leh lei lehna hmanraw hrang hrang man nasa taka tlahniam chuan loneitute phurrit tam tak a chhawk thei dawn a. Hei hian loneitute a tiphur zual sawt anga, hei hian kan thar chhuah (Agriculture product) pawh a ti pung ngei ang.

5) Sumdawngte leh eichawp zuarte tan:-

Tax tlahniam chuan sumdawngte nasa takin a pui dawn a, an sumdawnna a thang thur thur thei dawn a ni.

He GST 2.0 hi chhiah lakna bung thar pakhat mai a nilova, India in developed country nih a tumna ah nasa takin a pui dawn a, ram intodelh/ram hmasawn kan nih theih nana mellung pawimawh leh hriatreng tlak a ni tawh dawn a ni.

A tawp berah chuan central sorkar zarah Zoramin a hriatreng tawh tur “Malsawmna Thuahhnih” (Double Blessings) kan dawng a, GST reform avanga thil man tlawm hle tawh tur piah lamah Railway Service, abik takin cargo service avang hian bungraw phur man a letin a tlahniam leh bawk ang.

BJP Mizoram State Jt Treasurer Lalremsangi Fanai-in GST chungchang sawiin, Father of GST tih hial Pu Atal Bihari Vajpayee, Formar Prime Minister khan GST Task Force a siam a, bungraw thawn kawngah Border Check Post a awm tawh loh avangin, bungraw in thawn a awlsam phah hle a ni.

Khawvel ram hrang hrang Economy a buai nasa em em a, kan thenawm ram Sri Lanka, Myanmar, Bangladesh-te phei chu an tla chhe em em a ni. Keini erawh Ram intodelh lam kawng kan zawh mek a, intodelh tur chuan kan ram chhung siam a pun angai a, kan sum leh pai hi kan ram chhungah a kual tam angai a, Raw material, packaging, Farm Goods ah te chhiah lak a hniam a ngai a ni.

Ram khat kan nih angin, kan ram India ram hian Vision a nei a, chu vision chu Cooperative Federalism, Central,State, local govt te lungrual leh tangtlang taka ram hmasawn kan nih nana tan lak a pawimawh. Next Generation Reform hian a tum tlangpui nitin kan mamawh a Tax tihhniam apawimawh a, tunah Tax tihhniam ani ta a, mi nawlpui ten kan sum hman a tlem phah anga Saving kan nei thei tawh dawn a ni. GST avanga sum lo pung vanga India ram ro tling siam nan a hman a ni te hi a ropui hle a ni.

BJP State Vice President Malsawmtluanga chuan Sairang a Rêl lo lut avanga Mizoram mipui ten nasa taka a hlawkna kan chhawr thei tur hi alawm awm a, Rail Way Station Manager te nen ti ti hona kan neih na ah, Sairang Railway chu mamawh ang zel a Bungraw phur chi (Rail Wagon) te chu a tul ang zel a tihpun ani dawn a, Rel a thil phurh man hi a tlawm hle a, Guwahati to Sairang a bungraw phurh man Rail in Rs. 2 per Kg niin, Delhi to Sairang pawh Kg ah Rs. 3 chauh anih avangin Road Transport ah erawh Guwahati to Sairang Rs 7 per Kg, Delhi to Sairang Rs 20 per Kg a ni thung a, hetiang anih vang hian thil phurh man a intlawm hleih em em mai bakah a Rel chuan a thleng hma êm êm bawk a ni. Hengte avang hian Sairanga Rail lo lut hi Mizoram chuan nasa takin, kawng hrang hranga kan hlawkpui ngei kan beisei a, Prime Minister Pu Narendra Modi hnenah pawh lawmthu kan sawi mawlh mawlh a ni.

[Join WhatsApp channel for updates- https://whatsapp.com/channel/0029Vb66gtL8KMqnoM2JIz12 ]