Khawzawlah ruihhlo nuai 64 chuang man hu halral

Khawzawl | Sept 23, 2025: Vawiin chhun dar 12 khan Krishi Vigyan Kendra (KVK), Khawzawlah January 2025 atanga July 2025 chhunga ruihhlo man te halralna hun neih a ni a, Bawrhsap K Vanlalthiana’n telpuiin, Khawzawl SP F Lalbiakzauva'n hun a kaihruai.

January 2025 atanga July 2025 chhung hian Case 6 ziahluh niin, mi 7 man an ni a.

He hunah hian Heroin gram 84 cheng 2,52,000 man, Methamphetamine Kg 4.842 (Mum 40,400) cheng 61,64,600 man leh Ganja Gram 4,011, cheng 20,055 man te halral a ni a, Ruihhlo halral zawng zawng hlut zawng hi cheng 64,36,655 a ni.

Bawrhsap K Vanlalthiana chuan Khawzawl District chhunga ruihhlo heti zat man a ni hi lungchhiatthlak a tih rualin a mantu te fakawm a tih hle thu a sawi a.

Sum thianghlim zawk la lut tur a rilru leh taksa hrisel neih pawimawhzia sawiin, ruihhlo zuar tute leh a hmangtute pawhin a an sim ngei a duh thu a sawi a. Police te leh Excise te pekna leh thawhrimnaah a lawm hle thu sawiin, hun lo kal leh zel turah pawh hei aia nasa a tan laa, theihtawp chhuah leh zel turin a sawm bawk a ni.

Khawzawl Police chuan khawtlang hruaitute leh tlawmngaipawlte thawhpuina tha tak an dawnah lawmthu sawiin, ruihhlo dona kawnga theihtawp a tanpui tlat tu DC Khawzawl leh a thawhpui te leh department hrang hrang te chungah lawmthu an sawi bawk a. Kan ram leh hnam tichhe tu Ruihhlo do zel turin Khawzawl Police chuan khawtlang mipui, NGO leh Officials te an sawm thar leh a ni.

He hunah hian Excise and Narcotics Dept, Champhai Asst. Commissioner C Thangchuanga, leh Sub-Headquarters MHIP Khawzawl Lalrinthangi, in thusawina hun an nei a, anni bakah hian Sub-Headqrs MHIP hruaitute leh Khawzawl District Police te an tel a ni.