Mizoram Christian College-in College Week hawng

Aizawl | Sept 16, 2025: Mizoram Christian College chuan nimin khan Mizoram State AIDS Control Society ( MSACS) nen ṭangdunin, Vaivakawn Cultural Centre & Auditorium-ah College Week hawnna hun an hmang a, College week thupui atan "Ka hriselna, ka mawhphurhna (My Health, My Responsibility) tih hmangin, intihsiakna hrang hrang an ṭan nghal bawk.

College Week hawnnaah hian Mizoram Christian College Principal Dr. Tawnenga chuan thu sawiin, zirlaite chu dik leh rinawm taka inelna thianghlim hmachhawn turin a fuih a. Olympic swimmer Michael Phelps thusawi "Eng thilah mah in thlen chin tur bituk insiam suh u. In duhthusam a sân poh leh, chu chuan hmun hla zawk a thlen ang che u" tih chu zirlaite fuih nana hmangin, infiamna, zirna, an nun kawng leh engkimah rinna leh huaisenna nena an duhthusam um zel turin a fuih.

MCC College week nikhatna hi Lalrina Renthlei, South Asian Basketball Championship a India aiawh a Gold medal lo la tawhtu leh Snooker National Champion-in a hmanpui a. Lalrina chuan a tum tak tak leh tei rei peih tan chuan Mizo ṭhalaite tan Sports a sang tak thleng turin kawng a inhawnzia sawiin. Zirlaite chu Pathian bel tlat tur te, an hriselna vawng uluk tur te, ruihtheihthil laka fihlim tlat tur leh an thiltihna kawng tinrengah taima leh rinawm taka hma lam pan zel turin a fuih bawk.

MCC, College Week hi September ni 19 thlenga hman tur a ni a. Chite Playground, Electric Veng YMA Hall, Armed Veng Community Centre leh Dawrpui Multipurpose Hall ah te hman chhunzawm a ni ang.