Mafaa Hauhnar lehkhabu 'Riahrûn Remna' tlangzarh

Aizawl | Sept 19, 2025: Mafaa Hauhnar thuziak dahkhawmna, 'Riahrûn Remna' chu vawiin khan Tlangnuama an inah tlangzarh a ni.

'Riahrûn Remna' -ah hian Mafaa Hauhnar thuziak hrang hrang, lehkhabu-a a la tihchhuah loh te dahkhawm niin, chanchinbu leh magazine hrang hranga a lo tihchhuah tawhte leh, la tihdarh lem loh te a ni.

He lehkhabu hi Mafaa Hauhnar lehkhabu paruk a ni.

'Riahrûn Remna' hi cheng 300 in lehkhabu dawr hrang hrangah zawrh a ni.

C.Lalnunchanga’n a tlangzarh tak, ‘Riahrûn Remna’ hi kum 2018-a thih hmaa a thuziak hrang hrang lakkhawm a ni a. Chanchinbu hrang hrang, magazine leh zirna in annual magazine bakah pawl hrang hrang souvenir magazine-ah te a thuziak a lo thawh, lehkhabu-a tihchhuah si loh zinga tlemte lawrkhawm a ni.

Mafaa Hauhnar (H Lalrinfela) hian a thih hma khan lehkhabu panga - Chawlhna Tuikam (1997), Thlaler Aurawl (2008), Vaihna Vartian (2010), Hlim Ni leh Nuih Lai Ni (2011) leh Hringnun Hrualhrui (2018) a tichhuak hman a ni.