M Lalmanzuala lehkhabu ‘Nghet Taka Ding Zelin' (Revised & Enlarged) tlangzarh

Aizawl | Sept 20, 2025: M Lalmanzuala (IAS retd) lehkhabu ‘Nghet Taka Ding Zelin' Revised & Enlarged Edition’ chu vawiin chawhnu dar 1 khan Hotel Tavern, Chaltlangah Vanlalngaia’n a tlangzarh.

He hun hi Miss Mizoram 2020 Zirsangpuii’n a kaihruai a, NIT Mizoram Research Scholar Malsawmsanga'n Lehkhabu thlirlawkna a nei a, David Lalrinchhana pawhin thu a sawi.

Session hnihna hi MZU Research Scholar C Lalnundika'n discussion hun a neihpui a, ram leh hnam tana thu pawimawh tak tak sawi ho a ni. He hunah hian Ex-Minister Lalsawta Lalbiakzama MPS retd, Er Ruata Sailo, Lalrinmawii Fanai leh sawm bik dangte an kal khawm.

Nghet taka ding zelin (Revised and enlarged) ah hian Bung 30 a awm a. A ziaktu Manzuala chanchin ringawt a ni lova, mi hrang hrang a tawnte nena an thil tih ho dan te, chutiang mi a hmuh dante tlang takin a ziak a. Tin, Mizoram political history thui tak maiin a chhui bawk.

A pian leh mur atanga IAS exam zinkawng mai bakah Sawrkar hna a thawh chhunga thil thleng hrang hrang, MLA candidate a nih thlengin chip chiar fel fai takin a tar lang a. Sawrkar hnathawk, a bikin civil service lama hun hmangte tan inzirna tur a tam a. Thil kalhmang leh official taka mi dawr dan te pawh a zir duh tan chuan he lehkhabu atang hian zir tham fe a awm.