BEIDAWNNA HI PATHIAN NEN CHUAN BEIDAWNNA A NI LO

_Harsatna Paltlang Tura Pathian Dil_

- Rick Warren

- Sep 22, 2025

“Mi chu zozai, mi rawn bei tura lo thawkte chu han bei thei ziazang kan ni si lo va, a tih ngaihna reng reng kan hre bawk hek lo, i lam kan lo hawi mai zawk a ni e.” 2 Chronicles 20:12

Harsatna paltlang tura tawngtaina chu tawngtaina dang nen chuan a inang lo.

A tlangpui thuin i hlawhtlin theihnan Pathian chakna leh finna i dil thin a. Chutiang tawngtaina chu a sual hran lo!

Nimahsela harsatna paltlang tura tanpuina dila tawngtainaah chuan, “Lalpa, ka bei a dawng a. Keimahin ka ti thei lo va. Ka theihna bak a ni tawh a. Min tihhlawhtlinsak ang che.” Engmah i tih theihloh laia tawngtaina a ni.

Lal Jehoshaphata chuan Pathian lam a hawi ta a, “Mi chu zozai, mi rawn bei tura lo thawkte chu han bei thei ziazang kan ni si lo va, a tih ngaihna reng reng kan hre bawk hek lo, i lam kan lo hawi mai zawk a ni e.” 2 Chronicles 20:12

Harsatna paltlang tura i tawngtai anih chuan hetiang bawk hian ti ve ang che. Pakhatna, i rilrua awm diktak chu Pathian hrilh rawh. Theihna neiloin i inhria em, thil buan hneih theihloh neiin i inhre bawk em? Pathian hrilh ang che! I chau a ni tih leh i beidawng a ni tih hrilh bawk ang che.

Pathian nen in inzawm tawh ber chuan mi thilthei i nih a ngai kher lo - Pathian chu engkimtithei a ni si a. Pathian nen in inzawm tawh ber chuan engkim i hriat kher a ngai lo - Pathianin engkim a hria a ni. Pathian nen in inzawm tawh chuan hmun hran hranah i awm a ngai kher lo - Pathian chu khawi hmun pawha awm a ni si a.

Thil i thunun theihloh te, i thlak danglam theihloh te leh i enkawl theihlohtein engtinnge i tih ang? Pathian diktak a ni tih i hriat theihna turin kawng engkimah amah rinna nei chungin i nghak ang.

Lal Jehoshaphata ang hian, a chang chuan rinna chu engmah tihloh hi a ni. I ding tawp ang a, i nghak ang a, i ring tawp ang. Thil engemaw tih ilo tum ve si chuan, nangma rorelna hnuaiah awm tir i tum tihna a ni.

2 Chronicles a rinna kan hmuh chu hetiang hi a ni: “Judate zawng zawng chu an fanau te te, an nupuite an fate nen Lalpa hmaah an ding a.” (2 Chronicles 20:13). Pathian hmaah chuan hun engemaw chen an ding a ni. Engtia rei nge an din chu kan hre lo, nimahsela an ding tawp mai a, an tan chuan an harsatna tawh chu a lian lutuk tiin an hrilh a ni. An beiseina hrui chu a tawp tep a ni, nimahsela an bei zel a, Pathianin a pe ang tih an ring tlat a ni.

Harsatna paltlang tur i neih chuan, an tihdan kha entawn ang che. Nghak la, en la, ring ang che.  

Ngaihtuah zui atan

* I tidanglam theilo a ni tih i hriat vek hnu pawhin engvangin nge thiltihtheihna chu neih ila tum cheu?

* I nunah eng hi nge chinfel theihloh i neih le?

* Nangmah maia i tih theihloh chu Pathian beiseina nei chunga i nghah veng veng hian eng nge lo thleng le?

*[Lettu: Sangpuia]*