Japanese sports coach-te Mizoramah lo kal dawn

Aizawl | Sept 18, 2025: New Delhi-a cham mek Sports & Youth Services Minister Lalnghinglova Hmar leh Japan International Cooperation Agency (JICA), India hotute chu vawiin khan New Delhi-a JICA office-ah an inkawm.

Mizoram hmasawnna’na thawhho dan tur hrang hrang an sawiho zingah kumin December thlaa sports workshop buatsaih te, Mizoram coach-te kaihruai tura Japanese coach chah luh te, Japanese mipui nawlpuiin Mizoram leh Northeast India an hriatchian zawk na’na intlawhtawnte an rel.

Sports Minister Lalnghinglova Hmar chuan Mizoramin Olympic 2036 hmathlir a nei tih meeting-ah hian sawiin, he ‘vision’ hnuaia hmalak tawhna hrang hrangte a tarlang. Sports Minister hian sports discipline parukah Mizo coach te zirtira kaihruaitu tur ‘Japan Overseas Cooperation Volunteer (JOCV)’ hnena dilna an thehluh chungchang a sawi a, hei hi sawrkar laipuiin a approve tawh a, Japanese coach-te an lo kal theih dan tura chak zawka hma lakpui turin JICA hotute chu a sawm nghal a ni.

LESDE Minister ni bawk Lalnghinglova Hmar chuan Mizoram leh Japan chu thawk dun tur tak an nih thu tarlangin, Japan-in a mamawh tak nurse leh upa enkawltu (caregiver) chu Mizo thalaite thiam zawng tak a nih thu a sawi a. Sum leh pai piah lamah thiamna leh hriatna inthlengtawn a, ‘people-to-people connect’ hmanga intihchaktawn chu thawhhona tur pawimawh tak a nih thu a sawi.

JICA India hian Chief Representative Takeuchi Takuro leh Senior Representative Eiji Wakamatsu, te hovin Sports Minister hi an lo dawngsawng a, a hmathlir leh rawtna te chu lawmawm an tiin, JICA hmalak tum dan nen pawh a inhnerem hle tih an lo hrilh a ni.

Meeting-ah hian Mizoram sawrkar leh JICA thawhho dan tur hrang hrang sawiho nghal a ni a - a bul ṭanna turin kumin December thla laihawlah Tokyo-a ‘Nippon Sports Science University’ te nen tanghoin Aizawl-ah ‘Coach Development Workshop’ buatsaih nise tiin rel a ni. Workshop-ah hian Nippon Sports Science University-a mithiamte’n zirtirna an pe ang.

A thawh khatnaah hian sports kaihhnawih bik thlurbing phawt niin, kum dangah chuan skill development leh topic dangahte pawh workshop hi buatsaih zel tum a ni ang.

Mizoramin sports discipline paruk – Track & Field, Wrestling, Judo, Weightlifting, Table Tennis leh Archery – a JOCV volunteer a dilna chu tihhlawhtlin ngei an tum tur thu JICA India hotute chuan an sawi a. An harsatna tawh pakhat Mizoram lut tura ‘Protected Area Permit’ ngai chungchanga zawhna awmte chu Home Department hotute nen sawiho ni se, tih a ni.

Japan leh Mizoram (hmar chhak) inzawmna ṭha zawk a awm a theihna tura Japan-a Mizoram aiawhte zin tura JICA lamin an sawmna LESDE department-in tun hnaia an dawn chungchang pawh sawiho a ni a; Japan-a hmasawnna hnathawh leh hnathawk tura indawr tawn zel dan turte an zir dâwn a, zinna sensote hi JICA lamin an tum vek dawn a ni.