"Hindi hi lo thiam nal ila chu Politics-ah pawh tuna ka dinhmun aia sangah ka awm theih ka ring,"

Aizawl | Sept 15, 2025: Vawiin (Thawhtanni) September 15, 2025 khan Mizoram Hindi Prachar Sabha Office, MINECO-ah Hindi Diwas (Hindi Day) lawmna neih chu Adviser to CM (Political) Lalmuanpuia Punte MLA, chuan Khuallian niin a hman pui.

Hindi Diwas hi kum 1949 September ni 14 ah India Constitution in Hindi hi official language-ah a pawm avangin kum 1953 aṭang khan kum tin September ni 14 hian lawm ṭhin a ni a. Kuminah Pathianni a nih avangin ni 15 September-ah hman a ni ta a ni.

Khuallian Lalmuanpuia Punte chuan thu sawiin, Mizo ṭawng chauh thiam chuan a buaithlak, India ram bungkhat kan nih angin Hindi kan thiam hi a ṭul em em a ni a ti.

"Tleirawl laiin MNF movement vanglai kan tawng a, chu chuan min chiah hneh a, Hindi mai bakah vai hrim hrim ngaihsan lohna vangin Hindi kan thiam lova, a buaithlakin a inchhirawm hle. Ṭhangkhat lian lai India Hmarchhak zirlai pawl hruaitu-ah ka awm a, Hindi thiam loh avanga harsatna hi a taka tawngtu ka nih avangin, zirlai leh ṭhangthar ten Hindi zir an uar hi a tul hle a ni," a ti.

Muanpuia chuan sawi belh in, "Kei ngei pawh hi Hindi hi lo thiam nal ila chu Politics-ah pawh tuna ka dinhmun aia sangah ka awm theih ka ring a. India ram rorelna sang Parliament-ah te hian Hindi thiam tak MP te han nei chho zel thei ila Mizoram pawhin kawng tamtak ah kan chhawr tangkai in a rinawm" a ti.

"Arunachal Pradesh te hi India leh China ram inchuh a nih avangin an rilru hneh tumin Hindi an bei nasa a, Hmarchhak state-ah chuan Hindi thiam nal ber an ni hial awm e. India sorkar pawh hian Hindi thehdarh kawngah hian thahnem an ngai tawk lo deuh em aw Mizoramah pawh Project leh scheme Hindi thehdarhna atan hian la rawn vur nasa leh zual se, chu mi atan chuan Mizoram Hindi Prachar Sabha te pawh hi in pawimawh hle in ka hria," a ti.

[Join WhatsApp channel for updates- https://whatsapp.com/channel/0029Vb66gtL8KMqnoM2JIz12 ]