Dampa bial lamah Dr Thangtea a bir nghal!

Aizawl | Sept 4, 2025: Dampa bial by election-a MNF official candidate, MNF Senior Vice President ni bawk Dr R Lalthangliana chuan vawiin khan Dampa bial khaw hrang hrang a fang a. Ailawng, Reiek, West Lungdar, Khawrihnim, Hreichuk, Lungphun leh Kanghmun te a tlawh a. Dr Thangtea hi Pu Lalrintluanga Sailo nupui Pi Biakṭhuami leh a chhungte'n an ṭawiawm a ni.

Dr R Lalthangliana chuan thusawiin, "Tun ṭuma kan lokal hi chhungkaw programme-a lokal kan ni a. Campaign boruak vut vut a lokal kan ni rih lova, Pu Lalrintluanga Sailo sulhnu te fang a, a bial mipuite tlawhchhuak a, thlamuan tura lokal kan ni. Pu Rintluanga Sailo a bial mipuiin heti tak maia in ui hian mi a khawih hle a. MNF mi leh sa ni lo, Dampa bial mipui hrim hrimin heti taka in ui a, in chawimawi hi ka lawm tak zet a ni," a ti.

Pu Lalrintluanga Sailo nupui Pi Biakṭhuami pawhin thu a sawi a. "Kan pa in lo duhsak a, in lo hmangaih tawh ṭhinna leh dinhmun zahawm taka in lo dah tawhnaah lawmthu ka sawi a. Kan pa khan a rilru zawng zawngin a bial hi a veiin a ngaihtuah ṭhin a. Tunah amah a awm tak lohah chuan Dr R Lalthangliana a unaupa ang maia a en a rawn ding dawn a. In rilru leh thinlung zawng zawngin Dr Thangtea hi lo support turin ka ngen che u a ni," a ti.

[Join WhatsApp channel for updates- https://whatsapp.com/channel/0029Vb66gtL8KMqnoM2JIz12 ]