Thenzawl-in Peace City din tura hmalakna an thlawp

Aizawl | August 11, 2025: Thenzawl Joint VC, All NGO, All Political Party chuan nimin khan thuchhuah intawm siam, Thenzawl-a Peace City din tura hmalakna an thlawp thu an puang.

THENZAWL MIPUITE THUCHHUAH INṬAWM

Pathianin Mizo te chenna tur ram min pe a, zofate tana hmun him Aizawl aṭanga hla lo, Aizawl khawpui nena ṭangkawp thei tur Khawpui neih belh hi kan State hian a mamawh hle a, Pu Lalduhoma Serchhip bialtu MLA, Chief Minister ni bawkin kan ram mamawh hria a, Thenzawl ramlai hmuna Peace City din tura hma a la hi kan thlawp a, Mizoram ramlai chhim leh hmar chhak leh thlang mipuite tan pawh a panna awlsam taka hmun rem ṭha tak awm hi Mizo thawnthu a kan hmuh Chhurbura vuakzawl an lo tih ang kha a ni.

Kum 70 liam tawh aṭang khan Pathian aṭanga hriatna lo dawng tawhtu Pastor Chhawna leh mihlim Pu Chawngkhupa ten Zofate khawpui tur Thenzawl tiin an lo au tawh ṭhin a, Peace City lo inmun chho ta zel hian Pathian thil tum chu kan ram hian a tawng chho mek ni ah kan ngai a, kan bialtu Chief Minister in Peace City din a tuipui hle mai pawh hi ruahmantu Pathian remruat ngeiah kan ngai a, he hmalakna kal chho turah hian Zoram mipui leh zofa zawng zawngte ṭawiawmna kan ngen a ni.

Kan Chief Minister rawtna lo thlawptu pawimawh tak tak Pu Narendra Modi Prime Minister of India, Pu Amit Shah Home Minister of India te, Ministry of Housing & Urban Affairs (MOHUA) Govt. of India ten survey hnathawhnan Rs 10 crore an sanction te leh Pu K. Sapdanga'n a Department enkawl, Urban Development & Poverty Alleviation kaltlanga bawhzui tur a umzui naah te lawmthu kan sawi tak meuh a ni.

Publish By - Joint VC, All NGO, All Political Party, Thenzawl.