Tanhril bial huap tleirawl leh rawlthar puala ruihhlo that loh zia inzirtirna nei

Aizawl | August 9, 2025: Tanhril Presbyterian Kohhran huaihawtin; Tanhril Pastor Bial huap tleirawl leh rawlthar puala ruihhlo that loh zia inzirtirna chu MZU Auditorium, Tanhrilah neih a ni.

He hunah hian tlawmngai pawl Foundation For Drug-Free Mizoram te chu hun hmang tura sawm an ni a, Tanhril Bialtu Pastor Benny Lalmawia chuan inkhawm kaihruaiin; Resource Person Tv. Vanlalruata chuan taksa hrisel, rilru hrisel nei tur chuan ruihhlo leh a kaihhnawih laka fihlim a tul thu uar takin a tlangaupui a. Tanhril chu Mizoram zirna in sang ber awmna a nih avangin a mi cheng te pawh ruihhlo laka fihlim a inhmeh tih sawiin; entawntlak veng ni turin a fuih a, tleirawl mi 313 te ruihhlo laka fihlim turin an intiam.

Tlawmngai pawl Foundation For Drug-Free Mizorama Joint Secretary Tv. Aldrin Zomuanpuia leh an pawl life member Femina Miss India 2019 ni bawk, Nl. Nunui Rualhleng chuan kalkhawmte chu anmahni duhthlanna leh intihluihna awm miah lohin intiamtirna a nei.