Lirthei-a eizawngten kawng chhe siam nana 'TLAN CHAWLH' an puan titawp!

Aizawl | August 9, 2025: Lirthei a Eizawng Pawl Hrang Hrang Inzawm khawm te Joint Committee-in August 4 - 9  2025 chhung TLAN CHAWLH an puan chu August 9, 2025 tlai dar 4:00 atang hian CALL OFF/TIH TAWP a ni ti an puang.

Lirthei a Eizawng Pawl Hrang Hrang Inzawm khawm te Joint Committee aiawhin Chief Convener Robert L:alrinawma leh Convener Secretary Lalbiakhluna Renthlei te'n thuchhuah siamin, "August 4 - 9  2025 chhung TLAN CHAWLH kan puan chu, Pawl hrang hrang leh Mizoram Mipuiten tha tak a min zawm sak avang leh min support na avangin lawmthu kan sawi," an ti.

"Hetianga rei tak tlan thei lo a kan awm avang hian Lirthei a eizawng te hi kan tap tak meuh meuh a. Motor lian tam zawk te phei chu tlan ngam tawh lo in thla 3 chuang ding tawh te an awm," an ti bawk.

LIRTHEI A EIZAWNG PAWL HRANG HRANG TE JOINT COMMITTEE

PRESS RELEASE : Dt. 9 August, 2025

Lirthei a Eizawng Pawl hrang hrang te Joint Committee (Pawl 24) te chuan a hnuai a kan kawngpui te a harsatna kan tawh chungchangah Emergency Committee kan nei tawh a. Sawrkar hmalakna te a hmunah ngei vawi engemaw zat enin, kan eizawnna kawngte tlan nuam tawk a Sawrkar in a siam ngei theihna turin Sawrkar thawhpui pahin chak zawk a hmalak a nih theih nan hma kan la a.

Dt. 22nd July 2025 khan RD Conference Hall ah Emergency Meeting nei in, Dt. 23-30 July 2025 chhung ngei hian National Highway No, 306/06 (Sairang - Vairengte), National Highway No 108 (Sairang- Langkaih), National Highway No 6 (Kolasib - Bairabi) kawng te hi Lirthei rit phur a tlan ngamna tawk a siam turin Sawrkar kan ngen a, Press Release hial kan siam tawh a. Dt.28th July 2025 Khan heng Highway hrang hrang te hi keini pawl hrang hrangte chuan a hmunah kan en ho bawk a ni. Kan hmuhdan pawh hi kan sawrkar hotute hnenah pawh thlen a ni a. Amaherawh chu hemi chhung pawh hian a then chu han tlan ngamna tawk chu awm mahse, thenkhat laia hmalakna erawhin duhthu a la sam lo hle.

Dt.31st July 2025 (Ningani) khan Mizoram Truck Drivers Association Office a Lirthei a Eizawng Pawl hrang hrang Joint Committee emergency meeting chuan nguntakin a thlir a kan lirthei tlan vel ten hnathawhna a tibuai ni a an sawi tlat avangin thawl zawk leh chak zawk a hna an thawh theih nan hreh tak chung leh Zoram mipui te mai bakah lirthei a eizawng te tawrhna tur ni mahse Dt 4-9 August 2025 chhung hian Kawng siamna hun a tan TLAN CHAWLH kan puang kha  ni a. Kawng siam hna chak tak a an thawh theihnan a he ruahmanna hi siam kan ni tih Mizoram mipui ten min hriat sak a, phunnawi hauh lova min thlawp tlatna avangin lawmthu kan sawi nawn leh duh a ni. Kan hmalak zelna tur pawh Mizoram hmasawnna tur a ni tih hria a, min thlawp tlat zel turin kan sawm bawk che u a ni. An kawng siam te hi Keini Lirthei a Eizawng Pawl Hrang Hrang Joint Committee te chuan kan thlir in a theih ang a tam kan tlawh a, kan beisei angin hnathawk an tam lovin hmalakna te kan duhkhawp lo hle a ni.

National Highway No 108 (Sairang to Langkaih) leh National Highway No 6 ( Kolasib to Bairabi) te hi tun dinhmunah chuan duhthusam ni chiah lo mahse Sorkar hmalakna ah lungawithlak niin kan hre rih a. Chutih laiin National Highway No 306/06 (Sairang to Vairengte) kawng hi kan ram kawngpui pawimawh ber leh lirtheiin a zawh hnem ber a ni a, uluk tak leh tlan ngamna tawk a siam a nih theih nan hun kan pek pawh chu hnawhsarumin Dt 7.8.25 ah lirthei chhuah an ni ta a, Kawng an siam dinhmun te kan thlir in kan beisei a sang lo hle nachungin hetia Sorkar berin tlan tir a tum tlat takah keini Lirthei a Eizawng Pawl hrang hrang Joint Committee te chuan kan dang lova. Kawng chhe zual lai ah te hian Backhoe Loader (JCB) mai duty tir lovin Excavator lian ngei motor tang te tanpui turin duty se kan duh a ni. A khuar apiang a hnawhkhah nghal zel turin lung tam tawk inchhawp ni thei bawk se tha kan ti bawk.

Kolasib leh Vairengte inkar kawng hi kawng a chhiain Lirthei bungraw phur tan a tluk hlauhawm tak tak a la awm a, Heng kawng chhe zual lai te hi NHIDCL in chak zawk a a siam that theih nan a hma la lehzual turin Mizoram Sorkar pawh kan phut tlat a. Lirthei a eizawng pawl ten nawr zui ngai kher lova hma la vat vat turin kan phut bawk a ni. 

Fur chhunga helai kawng enkawl leh zelna turah heng te hi Sorkar hian min hriatsak se kan duh a:

1) Kawng hnawh nan a lung sawrkarin a lei te a hmunah Receive tu mumal tak awmin, Lung chhia ni a hmuh mai theih ang te phei chu hnawl ngam turin kan duh a.

2) kawng chhe lai leh Kawng tha lai hmun thenkhat a a tuihawk luankawr mumal lo te hi kawng a tlo zawk theih nan mumal leh tha tak a vil zui reng turin kan ngen a ni.

3) Kawng chhe zual lai a chirh leh lung inpawlh nuaih te hi kawng a tlo zawk theih nan lung hlang chauh a hnawh khah ni se tha kan ti.

4) Side drain haina vung te hmun dang a paih lova kawngsir a chhawp zel a ni hian kawng a ti tlo lovin tuitling a siam a, kawngin a tlo loh phah avangin heng kawngsir a leivung leh chirh chhek te hi hmun dangah paih ni se tha kan ti. 

Keini Lirthei a Eizawng Pawl Hrang hrang Joint Committee te chuan Dated 4 - 9 August 2025 Thleng Tlanchawlh kan puan hi kan thu a kan la din reng lai a, inpeih chiang lova Lirthei an tlan tir mai hi Sorkar inthlahdah zia leh thil an tih mai mai zia tarlanna ni ah kan ngai a ni.

Hetianga rei tak tlan thei lo a kan awm avang hian Lirthei a eizawng te hi kan tap tak meuh meuh a. Motor lian tam zawk te phei chu tlan ngam tawh lo in thla 3 chuang ding tawh te an awm a. LOAN pawh rulh harsa khawpin kan ding hial tawh a ni. Chhiah tam tak kan pek a, Petrol leh Diesel ah Cess 2% lai min lak sak leh bawk hnu pawh a tlan ngamna kawng tha min pe theilo hi Lirtheia eizawng te kan rum a, kan tap tak meuh meuh a ni. Heng kan harsatna te hi min hriatsak a Thla 3 (Thla thum) tal chhiah min awl tur leh Chhiah pek theih loh avanga Interest leh Penalty chawi ngai zawng zawng te ngaidam vek turin Sorkar kan phut a. Tin, Mizoram Chhunga Financial Insitutions hrang hrang te pawh kan harsatna hrethiam a an hnena loan la te harsatna lo siam sak lo turin kan ngen bawk a ni. 

Lirthei a Eizawng Pawl Hrang Hrang Inzawm khawm te Joint Committee chuan Dt 4 - 9 August 2025 chhunga TLAN CHAWLH kan puan chu Pawl hrang hrang leh Mizoram Mipuiten tha tak a min zawm sak avang leh min support na avangin lawmthu kan sawi a. Dt 9th August 2025 tlai dar 4:00Pm atang hian CALL OFF/TIH TAWP a ni tih kan puang e.

(ROBERT LALRINAWMA)                                     (LALBIAKHLUNA RENTHLEI)

 Chief Convener                                     Convener Secretary

LIRTHEI A EIZAWNG PAWL HRANG HRANG TE JOINT COMMITTEE - 2025