MNF-in Mizoram Independence puan kum 60-na ropui taka lawm tum

Aizawl | August 9, 2025: Mizo National Front chuan ni March ni 1, 1966-a Mizoram Independence a puan champha kum 60na, Diamond Jubilee chu ropui taka March ni 1, 2026-a hmang tanin, kum tluana hman tura inbuatsaihin, Celebration Committee a din chu ni 8.8.2025 chawhnu Dar 1 khan Mizo Hnam Runah thutkhawm a ni a, he hun hi Celebration Committee Chairman MNF Sr. Vice President Dr R Lalthangliana'n a kaihruai.

Meetingah hian zofate tana Zalenna puan champha lawmna chu Mizo Nationalism puanzar nan leh Hnam rilru zofaten thuk zawka kan putna tur lam hawi zela hman nise, tih a ni a. Mawhphurhna hrang hrang chanvo insiamin, Sub-Committee 7 din a ni a. Independence puan kum 60-na lawmna hi Zoram pum huapa hman tum niin, MNF Sub-Headquarters leh Block hrang hranga bawhzui turin ruahmanna pawh duan chhoh zel tur a ni.

Meeting kaihruaitu Dr R Lalthangliana chuan, hun ropui leh chhinchhiah tlak, Pathian kaihhruaina a thleng tura inbuatsaihna kalpui meknaah, Zofaten Zalenna hmu tura kawng kan zawh mekah hian Zalenna puan hun champha chu urhsun tak leh ngaipawimawh taka kan hman a tul a, Mizo Hnam hlut tak leh dah pawimawh tlatna nei chunga Zalenna sual alo ni chu hriatreng phu leh Mizote tan dai tawh ngailo tur Mellung pawimawh tak a ni, tiin meeting member te he hun hmang tura inbuatsaihna kawngah pawh ngaithuahna thuk taka kan sen a tul a ni, a ti.

MNF Vice President Vanlalzawma chuan, kan Hnam chanchina chhinchhiah tlak leh hlu berte zing ami Mizoram Zalenna puanna champha chu Mizoten kan hlut deuh deuh tur leh, chhuang taka hnamdang hnenah pawh kan sawirik tur niin, he ni pawimawh ngaihlut kawnga thangtharte tana kawng sat eng zeltu tura kan inbuatsaih a tul hle a ni, a ti bawk.

Committee Vice Chairman MNF Treasurer Lalruatkima pawhin, kan Hnam hian a bula let leha, Hnam a chhiar ve kan nihna tura kan pasaltha te Sulhnu hnutchhiah theihnghilh lo leh ngaisang tak chunga, kan Hnam chawisang zawnga kan pen nat deuh deuh a tul a. Hnam chhuanawm leh rintlak kan nihna te pawh kan pholan uar zel a tul a ni, a ti a. Engkim chan huama Zalenna lo sualtute chu kan zah a, kan ngaihhlut deuh deuh a tul tiin, Independence puan Diamond Jubilee lawmna buatsaih hian a tha thei ang bera Mizo Hnam tan nghawng a neih ngeina turin inbuatsaihna kalpui a nih tur thu a sawi bawk.

Celebration Committee ah hian member 70 awmin meeting hi an kal tha hle a. Phur tak leh inpawh tlang takin, hmalak zel dan tur rawtna hrang hrang sawiho a ni a. Meeting tan nan Pathian hnena inhlanin MNF General Secretary Dr Renee Lalrinzuali (d/o. Laldenga, MNF Founder President) a tawngtai a. Ex-MNA President H Rochungnunga'n huntawp tawngtaina a hmang bawk.

[Join WhatsApp channel for updates- https://whatsapp.com/channel/0029Vb66gtL8KMqnoM2JIz12 ]