"Sawrkarin a ruka State Capital sawn a tum dan kalphung hi thil kalhmang lo, Mizoram Mohammad Bin Tughlag kan nei ta ni berin a lang, "- Zoramthanga

A RUKA STATE CAPITAL SAWN TUM DAN KALPHUNG CHU THIL PANGNGAILO LEH MITE NUIHZAT TUR A NI

- Zoramthanga, Ex-Chief Minister & President, MNF

Aizawl | AUgust 4, 2025: Vawiin ni 04.08.2025 thawhtanni chawhma dar 11 khan Mizo Hnam Run chhung inkhawm neih a ni a. Hun hnihna political session-ah Pu Zoramthanga Ex-Chief Minister leh President MNF nibawk chuan thusawiin, 'Mizoram Sawrkarin a ruka State Capital Aizawl atanga Thenzawla sawn a tum dan kalphung chu thil kalhmang a nih loh thu leh Mizoram Mohammad Bin Tughlag kan nei ta ni berin a lang, a ti.

Kumin 2025, April ni 24 khan Seema Rani, section officer (AMRUT-IIB), MoHUA, New Delhi chuan Chief Secretary leh Resident Commissioner, Mizoram hnenah, “shifting of State Capital from Aizawl to Thenzawl, Mizoram” tiin DPR siamna tur chungchang lehkha a thawn a. Hei bakah hian sawrkar lehkha kan hmuh theih hrang hrangah Mizoram state capital Aizawl sawnna tur thu hi a chuang a ni. Hemi chungchangah hian Chief Minister-chuan Aizawl khawpui tawt lutuk tihziaawmna tura ‘peace city’ din tum a nih thu bak hi mipui ah puanzar a la nei lo a, NGO te leh Party hrang hrang bakah Zoram mipuite pawh rawnna pakhat mah a awm hriat a ni lova. Hetiang thu liantham hi chu Cabinet Meeting thutlukna tal pawh awm tur nia a lan laiin, chutiang chu Zoram mipuite hian kan hrelo a, Kan Chief Minister thil tih dan hi thil nihphung pangngai nilo, mipuite tana pawmpui remchanglo a ni a, MNF tan pawh Khawpui sawn tum dan kalphung chu pawm chi ni lovin, a thalo kan ti takzet a ni, a ti bawk.

MNF President chuan, Mizoram state Capital Aizawl hi thenzawlah sawn dawn pawh nise, Aizawl mipui tam zawk fein rem an tihpui loh tur a ni a. Rem an tihpui loh mai ni lova, kan sawrkar kalpui dan kalphung chu an nuih tiza tur a ni. Tun dinhmunah Khawpui sawn chu thil harsa tak, sum leh pai tam tak luanralna tur leh mi tam tak nghawng tur a nih avangin, mahni duhthua thil kalpui ngawt chi a nilo, a ti bawk.

He hunah hian mithar duhawm tak, Pu Hrangpenga, Pangkhua Govt. Bethel High School Teacher Pension, chu Pu Zoramthanga chuan MNF party ah lawm takin a lawmlut a. Sawrkarna fawng kan chelh loh laia, Hnam rilru pu chunga MNF min luhchilhtute hi MNF tan chuan mi hlu tak an ni, tiin, MNF chuan kiam lam aiin pun lam ala pan zel tur thu a sawi bawk.

Pu Ramthanmawia MLA East tuipui bialtu leh PAC Member, MNF ni bawk pawhin thusawiin, a MLA pui boralta, Pu Lalrintluanga Sailo sunna leh Zahna chibai bukin, a ui takzet thu a sawi a. Ram tana ke a lo penna zawng zawngte, hna tha tak leh chhinchhiah tlak tak tak alo thawhte hi engtikahmah theihnghilh a ni dawn tawh lova, Thangtharten an la hlut chhoh tulh tulh dawn a ni, a ti.

Pu Papuia chuan, MNF sorkarin Ram leh hnam tan nasa takin ke a lo pen tawh thin a, Pu Laldenga min lo hruai tawhna te kha kan la chhawmnung zel a, chawl lovin kan la chhunzawm zel dawn bawk a ni. Mizoram hi Party hrang hrang Pali in min hruai tawh a, Tu Party-in nge Ram leh hnam hi hmangaih a, a taka thil ti thin, tih hi kan in zawh a, kan chhut nawn a ngai hle in ka hria a, mipuite pawh kan ngaihtuahna te ngun taka seng a, chhut ngun leh zual turin ka chah duh a ni, a ti bawk.

East Tuipui bialtu MLA chuan, a bial mipuite tan hna a taka, theihtawpa a thawh zel thu sawiin, a theih dan kawng awm ang ang dapin, hmasawnna pawh kan hmu zel a ni, a ti a. Kan sawrkar hrawn mek ZPM hian, Samthang khua kut hnathawktuten lei rem an lo rah vena tura zikhlum chingtute chu, an thlai tharte an intiam anga, an leisak leh thei lo chu lungchhiatthlak a tih thu sawiin, mawhphurhna la ngamlo sawrkar kan nei chu pawi a tih thu a sawi bawk.

Chhung inkhawm hi Pu Laltlanzova Khiangte, Executive Corporator, AMC leh Secretary, MNF GHQ- nibawkin a kaihruai a. Pu F. Lalthankhuma, Secretary, MNF GHQ chuan hunserh a hmang a. Pu David Lalmuanpuia hnen atangin tun hnaia CADC chhunga MDC By Election awm tura Er. R. Rohmingliana, MLA leh General Secretary, MNF hova Campaign a fehchhuah a nih dan report ngaihnawm tak ngaihthlak a ni bawk.

[Join WhatsApp channel for updates- https://whatsapp.com/channel/0029Vb66gtL8KMqnoM2JIz12 ]