PATHIAN KOHNA CHHANG TURIN TLAI A AWM LO

_Tumruhna Danglam_

- Rick Warren

- Aug 4, 2025

 

“Ngai teh, tunah hian kum sawm riat leh kum nga ka lo ni ta a. Chuti chung pawhin tun thleng pawh hian Mosia mi tirh lai ang mai bawk khan ka la chak reng a, hmana indo leh chhuahvah nan thahrui ka nei ang bawk khan tunah pawh hian ka la nei reng asin. Chutichuan, he tlang, Lalpan khami nia a lo sawi tawh kha mi pe ta che.” Josua 14:10-12

I nuna Pathian kohna chhang tur hian tlai luat a awm lo.

Mosian ram tiam enthla tura mi 12 a tirh te kha an lo haw a, Pathian mite tan chuan chu rama khawsak chu a harsa angin tiin thu an hawn anih kha. Kha an rinlohna avang khan Israel fate kha thlalerah kum 40 dang a vakvai anih kha. Chuta kal zawng zawng chu ram tiam an rin loh avangin an thi vek anih kha. Kaleba leh Josua erawh chuan an ring a, an nung a ni. 

Kum 40 hnuah Israel fate kha ram tiam lama an kir leh khan, Kaleba chuan hetiang hian a sawi a, “Ngai teh, tunah hian kum sawm riat leh kum nga ka lo ni ta a. Chuti chung pawhin tun thleng pawh hian Mosia mi tirh lai ang mai bawk khan ka la chak reng a, hmana indo leh chhuahvah nan thahrui ka nei ang bawk khan tunah pawh hian ka la nei reng asin. Chutichuan, he tlang, Lalpan khami nia a lo sawi tawh kha mi pe ta che.” Josua 14:10-12

“He  tlang, Lalpan khami nia a lo sawi tawh kha mi pe ta che” - a va ngaihnawm tak em! Kaleban ram a duh chu milian tamna a ni a, an khawpui te pawh kulha hung khup a ni. Pathian hnenah chuan hetiang hian a sawi angah ngaihsak ila, “Lalpa hna harsa min pe rawh. Khawpui beih harsa tur min pe rawh. Mi lian tak tak awmna ram min pe rawh. Tlang ram min pe rawh. Ram awlai min pe suh. Kum 85 ka ni tawh tih ka inhria, nimahsela i tana thil ropui tak tih ka la duh a ni.”

Ka tunu ta tur birthday card lei turin ka kal a, ka la hmuh ngai loh ka hmuchhuak a. Tunah chuan kum 80, 85, 90, 95 leh kum 100 pek tur thlengin card an lo nei tawh a! Tunhma chuan, chutiang chu kan hmu ngai lo, mihring an damrei loh vang a ni. Tunah erawh chuan kan lo dam rei ta deuh a ni.  

Kum lama upa deuh tan chuan, awm mai mai a hun tawh i ti maithei e. Nimahsela hei hi ka hrilh ang che, chu zia chu paih a hun tawh. Pathianin kum 30 dang chu infiam mai mai turin a dam tir che tih i inring em ni?

Bible-a inziak lo ka hrilh ang che: Hna atanga chawlhna. I hna atang chuan ilo chawl ve ta pawh a ni maithei e. Nimahsela Pathian rawng bawl zel rawh. Tawnhriat leh finna pawh i naupan deuh lai ai chuan i ngah zawk daih a, chung te chu Pathianin a tithlawn lo vang.

Kum 85 anihin Kaleban  a nuna mission pawimawh tak a tan a. Mosia kha Pathianin a mite chhuah zalen tura a koh khan kum 80 mi a ni.  Abrahaman Pathian kohna a dawn khan kum 79 a ni tawh a ni.

Kaleba kum ang rual hi i nih chuan, i nuna kohna i dawn chu chhang turin ila tlai lo a ni. Hun tha zawk chu a lo la thleng ang! 

Ngaihtuah zui atan

* Kaleba kum ang rual hi i nih chuan, i hna atanga i chawlh hnuah Pathian Ram tan engtin nge thawh i tum? Pathian kohna chu kum 10, 20 emaw 30 emaw hnuah engtin nge i chhan ang? 

* I hna atanga i chawlh hnua i thiltih tum chuan Pathianin tana i thiltum i thawh tumdanah engtiangin nge nghawng a neih?

* Engang kum rual pawh ni mah la, Pathianin a kohna che chu engtiangin nge i chhan le? 

*[Lettu: Sangpuia]*