Sawrkar hnathawk ten Drug Free India Campaign thutiam an la

Aizawl | August 13, 2025: Vawiin ni khan Mizoram Secretariat tualah Nasha Mukt Bharat Abhiyan (Drug Free India Campaign) thutiamna hun hman a ni. Chief Secretary charge la mek H Lalengmawia, IAS in he thutiamna hi kaihruaiin Mizoram Secretariat a thawktu officer leh staff thahnem tak an tel a. Hetih rual hian Sawrkar pisa hrang hrangah leh District hrang hrangah he thutiam lakna hun hi hman a ni bawk.

Ministry of Social Justice & Empowerment, Govt of India chuan NMBA hmang hian India ram pumpuiah Ruihhlo Do beihpui a thlak mek a. August ni 1 atang khan tanin 31 chhung (tun thla chhung zawng) campaign hi neiin, August ni 13 hi NMBA kum 5 a tlinna champha a nih angin India ram pumpuiah he thutiam lakna hun hi neih a ni a. Mizoramah pawh District tinah kalpui mek a ni bawk.

He thutiam hi online pawhin a lak theih a, mi zawng zawngte nmba.dosje.gov.in/pledge-certificate?type= ah hian lo la ve turin Social Welfare department chuan a sawm a ni.