“MYC kal tlang hian Mizo thalai 170 zet ten kum 2024 - 2025 chhungin hna an hmu tawh a, ram pawna hnathawkte hlawh hian Mizoram chhunga sum che vel pawh a nghawng pha a, kan sum lak luh tipungtu pakhat an ni”

Aizawl | August 11, 2025: Vawiin khan ZPM General Headquarters' chuan party chhung inkhawm Party Office-ah kan nei a; Mizoram Youth Commission Chairman Malsawmzuala Ralte chuan thu sawiin, MYC-in Mizo thalaite tana hna a thawh dan leh tun hnaia Hulhliap Short Stay Centre chungchanga sorkar hmalakna te a sawi fiah.

Malsawmzuala chuan "Mizo thalai UPSC exam hrang hranga inziah tlin tum, prelims pal tlangte chu nikum atangin exam atana an inbuatsaihna tur zirlaibu man an insensona te rulh letsak vek an ni a, mi pakhatin Rs. 35,000.00 vel zel an dawng a ni. Mains-a tling, Delhi-a interview-te chu MYC-in engkim a tumsak vek a, Kuminah Mizo thalai 6-in prelims an pal tlang a; an lehkhabu leina te MYC-in a tumsak leh mek bawk. Sorkarin hna a lak tur Group A leh B exam coaching class changtlung tak kalpui mek a ni a, tunah hian zirlai 109 an awm mek a; fees hi thla 4 chhung atan Rs. 4000 niin Lunglei, Kolasib, Champhai leh Siaha-ah te coaching hi kalpui mek a ni. Sorkar kum kal ta chhungah khan MYC coaching class a kal thin thalai mi 33 chu sorkarin hna a lakah an tling a. Kum 2024 atang khan Community Social Responsibilty (CSR) hmangin, Visan Foundation nen kil 3-in thawh ho a ni a; Hotel Management Food & Beverage training batch 5 zawh fel tawh niin, MYC office-ah training-in zirtirtu hlawh leh trainee uniform te hi HONDA-in an tum vek a ni. Sorkar kum liam ta chhung khan Mizo thalai 114 zetin India ram hmun hrang hrang hotel changkangah hna hmuin an thawk mek a. Kuminah dilna hawn leh a ni a, tunah hian training lai 70 an awm mek bawk. Ruahman anga thil a kal tluan chuan, India ram Hotel thaho bakah foreign hotel liante pawhin an rawn interview ve dawn a ni. Kumin financial year chhung hian Hotel Management Training seat 200 kan nei a; tunah hian Lunglei leh Champhai Youth Centre-ah batch 1 ve ve training turin ruahmanna peih fel ni tawh bawk. India ram hmun hrang hranga Hotel nei The Lalit te nen thawh hona thuthlung ziah a ni a, Spa therapist training tur an la a, an hotel-a thawk zui nghal tur Mizo nula 15 nikum chhung khan MYC-in a tir chhuak tawh bawk a ni. Kum 2024-ah khan Mizo thalai British Army-chawlh hmanga lo hawte nen thawh ho kan rel a, Mizo thalai 247 zet Bristish Army-a tang turin dilpui an ni a, heng zing atang hian mi 5-in kohna dawngin, MYC-chuan loan dilpuiin, April thla khan England-ah kalin an tling fel tawh nghe nghe a ni. Governor kal chhuak tain min sawm angin, Sri City Special Economic Zone, Andhra Pradesh-ah ka zuk zin a, Company lian pui pui 200 chuang an lo awm khawm a, heng company zinga Daikin Air Conditioner siamtute nen indawr zuiin, Mizo thalai 8-in hna an thawk mek a ni. MPSC hnuaia Combined Competitive Exam atan bik chauh coaching class tan turin ruahmanna siam mek ni bawk a. Batch tinah zirlai harsa, tum ruhte tan discount emaw, a thlawna class kal theihna tur emaw seat 10 vel zel nei turin ruahman a ni bawk. UPSC-ah Mizo thalaite an tlin ngei theih nan, UPSC coaching class nei turin ruahmanna siam zawh tawh a ni a, kumin July 23 khan Finance Department atangin hmalakna tur sum sanction order hmuh a ni tawh. Delhi-a Chanakya IAS-te nen thawk hovin, zirtirtu experience nei tha chah chhuah an ni dawn a, MYC office-ah coaching class tha tak hawng thuai turin ruahmanna peih fel a ni tawh bawk. Staff Selection Commission leh Banking-a Mizo thalai tam zawk an luh theihna turin, Coaching Class nei tura inbuatsaih mek a ni a, zirtirtu tha leh rin tlak zawn mek a ni. MYC hian a theih ang angin Corporate Social Responsibilty (CSR) a dap kual a, State Bank of India in Nuai 25 man Bus min pe tawh a, HONDA Company-in Rs 14,26,10- in min pui tawh a, Mizoram Rural Bank-in Computer 20 set, dawhkan leh chair set 20 ve ve min pe dawn bawk a ni. MYC kal tlang hian Mizo thalai 170 zetin kum 2024-2025 chhungin hna an hmu tawh a, ram pawna hna thawkte hlawh hian Mizoram chhunga sum che vel pawh a nghawng pha a, kan sum lak luh tipungtu pakhat a ni”, a ti.

MYC Chairman chuan, “Mizo thalaite ruihhlo sal tanna avanga buai an tam em em a, hei hi kan hotute, a bik takin Chief Minister Lalduhoma chuan a vei hle a, thalaite hi chhanchhuah theih an nihzia hriain, beiseina sang tak nen a hmalakna hnuaiah Hulhhliap Short Stay Center kalpui mek a ni a, hotuten tling lo tak chungin Core Committe-ah Chairman-ah min dah a; kohhran leh tlawmngai pawl te, sorkar hotute nen theih tawp chhuah mek a ni a. Batch 2-na zo tawhin, August 25-ah hian Batch 3-na kalpui leh a ni dawn a, kum 2026 March thla thleng kalpui tura ruahman mek a ni. Hulhhliap Short Stay-ah hian Gospel Camping anga kalpui nghal ngawt lovin enkawl an ni a; doctor leh nurse-ten an vil reng a, psychologist eng emaw zatin a mimal angin councelling an neihpui thin a, an taksa leh thlarau tihchakna turin mi thiamten Pathian thu nen ni tin hun an hmanpui thin bawk a ni. Sorkar pawhin hemi atan hian sum a seng hnem tawh hle a, a hlawhtlin zui zel kan beisei tak zet a ni. Kohhran leh mimal tawngtaina an dawng nasa em em a, tha thlah lova tawngtaipui zel an ngai tak meuh meuh a ni,” a ti.

Vawiin chhung inkhawm hi General Secretary H Chhawntluanga'n a kaihruai a, Adviser HL Chungnunga'n hunserh a hmangin, ZPM party zawm thar Bru Welfare Chairman Biakthuama Tanhril chu ZPM President Lalliansawta'n a lawm lut bawk. Minister Lalnghinglova Hmar leh AMC Corporator eng emaw zahin chhung inkhawm hi an uap.