"Mizoram politics hi chhut theih a ni a, inthlanpui awm leh turah MNF kan sorkar leh dawn,"

Aizawl | August 1, 2025: Vawiin August 1, 2025 chawhma dar 11 khan Chawngte 'C' Kamalanagar IV-ah 7-Kamalanagar (W) Bial by election neih turah MNF chuan campaign hawnna an nei a. Campaign hawngtu Er. R. Rohmingliana, MLA chuan Mizoram politics hi chhut theih a ni a, inthlanpui awm leh turah MNF chu sorkarna siamtu tur kan ni, a ti.

Next MLA Election-ah MNF kan sorkar leh dawn tiin Rohminga MLA chuan a chhan a sawi a: "Politics hi thil chhut theih a ni. Uluk taka chhut chuan tunge sorkar dawn tih a hriat theih. Mizoramah political party kan tam lova, chhut a harsa lo.

"Congress chu lian tak an ni thin. Mahse tunah chuan te tak te chauh an ni tawh a, Central-ah pawh reuh te an ni. CADC-ah pawh vote hmu tlem ber an ni ang.

"ZPM party chu mipuiin enchhin an chak avangin an sorkar mek a. MLA inthlan lehah chuan an tla nasa ngawt ang. Enchhin duhtute an inchhir tawh a ni.

"Party hrang hrang kalkhawm an nih avangin tunah hian an inngeih lo hle. An hruaitute (an vai chuan ka ti lo) chu mi thar an ni lo, party danga hruaitu lo ni tawhte tho an ni. Tunah hian hna an inchuh.a, hruaitu leh hruaitu an intibuai mek a ni. CADC-ah chuan ZPM hruaitu thiltih dan in hriat chian tawh avangin MNF-a lo lut turin ka sawm che u, a ti.

"Aizawl leh khawpui dangah chuan ZPM hi kan enchhin fuh lo a ni, an ti tawh a, tunlaia Oil harsatna leh kawngpui chhe nasa lutukte chu inthlan leh huna an tlak chhan tur a ni, a ti.

"Sorkar siam an chak lutuk avangin thil tam tak an sawi a. 'Kan ti ang' an tih apiang an ti lo a. 'Kan ti lo ang' an tih apiang an ti leh si a. Chu chu mipuiin an hrechiang a ni," a ti.

Thorang MLA Er. R. Rohmingliana chuan BJP pawhin Central-ah kan lal tiin thu an rawn sawi a ti bawk a. "Chu chu inbumna mai a ni. State sorkar kaltlang lovin engmah an ti thei lo. ZPM sorkar nen an inngeih si lo a, development a kal tak tak thei dawn lo. Union Home Minister a lo kal khan Chief Minister a hmun duh thu a sawi lo. A hmuh duh chu Zoramthanga a ni. ZPM CM Delhi kal haw pawhin engmah a rawn hawn ngai lo," a ti.

"MNF sorkar apiangin CADC-ah enge a tih thin? Leihlawn, kawngpui, bazar hmunte etc. chu MNF siam vek a ni a. Tuna hna lian tender mekte pawh hi MNF hun laia tih vek a ni, a ti bawk.

Campaign hawnna inkhawm hi PC Chakma (Chairman MNF District Level Campaign Committee)-in a kaihruai a. MNF District Adviser RM Chakma, MLA bakah MNF Candidate Rupayan Chakma-ten thu an sawi bawk a ni.

[Join WhatsApp channel for updates- https://whatsapp.com/channel/0029Vb66gtL8KMqnoM2JIz12 ]