mipui hman theiha X Ray khawl peihfel a nih avangin Hrangturzo Bialtu MLA-in lawmthu sawi

Aizawl | August 1, 2025: Hrangturzo Bialtu MLA Lalmuanpuia Punte, Adviser to CM ni bawk chuan a bial chhung khaw pathuma X-Ray khawl chhia thlakna tur, MLA (LAD) Fund atanga a lei chu mipui hman theiha install zawh a nih avang leh hlawhtling taka X Ray pawh neih a nih avangin lawmthu a sawi.

Muanpuia hian a MLA Fund hmangin Biate CHC, E. Lungdar PHC leh N. Vanlaiphai CHC-ah te X-Ray khawl thar a lo leisak tawh a. A X Ray khawl thar leite hi Biate - July ni 23, E. Lungdar - July ni 24 leh N Vanlaiphai - July ni 25 khan install niin, X Ray pawh hlawhtling taka neih nghal a ni.

Thil tih ngai hrang hrang harsa tak tak a awm avangin install mai theih lohin a awm reng a, Health Minister Lalrinpuii te, Health Commissioner H Lalengmawia IAS bakah Health Department lama thawktuten harsatna tam tak su tlanga chak taka hma an lakna avangin tunah hian install zawh tawh niin, mipui hman theiha peih fel a ni ta a ni.

Muanpuia chuan hun rei tak harsatna hrang hrang avanga install hleih theih loha awm tawh, tuna mipui hman theiha a awm ta hi lawmawm a tih thu a sawi a. Health Department lamin ngai pawimawha harsatna tam tak pal tlanga X Ray khawl bun fel a nih theih nana thawktu zawng zawngte chungah lawmthu a sawi bawk a ni.

Muanpuia chuan a bial chhunga CHC pahnih leh PHC pakhata X-Ray khawlte hi rei tak a chhiat tawh avangin accident tawk leh damlo X Ray ngai ten Serchhip leh Khawzawl an pan zel a ngaih thin avangin, campaign laia a lo intiam tawh ang ngeiin a hmaa an neih sa X Ray khawl chhe tawh aia khawl tha zawk, MLA Fund atangin X Ray khawl thar 300 MAH a leisak a ni.

[Join WhatsApp channel for updates- https://whatsapp.com/channel/0029Vb66gtL8KMqnoM2JIz12 ]