Mizoram Larsap-in MZU NAAC A+ Grade hmuh lawmna hmanpui, MZU e-Office Portal a tlangzarh

Aizawl | August 5, 2025: National Assessment and Accreditation Council (NAAC) in zirchianna tunhnaia a tih chhuaha Mizoram University (MZU) in A+Grade (CGPA 3.30) a hmuh thar lawmna, MZU Auditorium-a buatsaih chu vawiin khan Larsap General (Dr) Vijay Kumar Singh, PVSM, AVSM, YSM (Retd), Chief Rector, MZU chuan khuallian niin a hmanpui a, MZU e-Office Portal a tlangzarh nghal bawk.

Larsap General (Dr) Vijay Kumar Singh chuan MZU in NAAC A+ Grade a hmu thar chu a lawmpui thu sawiin, University la naupang tak kum 2000 a din, 2001 a kalpui tan MZU in hun reilote chhunga hlawhtlinna hrang hrang a hmu leh India hmarchhak bakah ram puma zirnna tha zinga chhiar tel a ni chu chhuanawm a tih thu a sawi a. NIRF-in India ram University tha zual a thlan chhuah top 100 zinga MZU a lang pha char char leh tunhnaia 77-na dinhmun a hauhte, Central University bik inelna IIRF tehnaah 15-na dinhmun a hauh phate chu chhuanawm a tih thu a sawi a. Hmasawnna tur tam tak a la awm thu leh endikna neih leh hunah tun aia result tha zawk neih ngei a beisei thu sawiin, tumna tak tak neia hmasawnna lian zawk kan ngaihtuah phawt chuan hlawhtlinna kan chang thei a ni, a ti bawk.

Larsap chuan MZU in hmasawnna a hmuh hrang hrangte tarlangin, National Education Policy 2020 leh Academic Bank of Credits tha taka kalpui a nite, research publication-ah h-index 98 a hmu leh patent 46 lai a neite, MOOCs leh SWAYAM hnuaia hmarchhak state zinga online course kalpui hmasa ber a ni thei leh DRDO Industry-Academia Center of Excellence nei chhun a nite chu fakawm a tih thu a sawi a. Vohbikte tana nelawm leh leilung leh nungchate humhimna tha tak campus an neite, zirna piah lama hmalakna nung tha tak tak an kalpui thinte chu lawmawm a tih thu sawiin, India ram hmun hrang hrang bakah ram dang 15 atanga zirlai 43 lai an nei chuan zirna tha tak a nih zia a lantir thu a sawi a. Zirnain a tum ber khua leh tui tha leh hruaitu tha chherchhuah kawnga tanlak a tul thu sawiin, zirlai leh zirtirtute chu taimakna leh tumruhna hmanga University chawisangtu nih tum turin a fuih a. Nakin hun atana inpuahchah lawk tur leh zirbingna, thil thar ngaihtuah chhuah leh tunlai thiamna hman tangkai kawnga hmahruaitu nih tum tura fuihin, State University tan mai tur atana lo inruahman lawk turin a chah nghal bawk.

Thusawitu dang MZU Vice Chancellor Prof. Dibakar Chandra Deka chuan India rama Central University 56 atanga NAAC A+ Grade dawng thei tlemte zinga MZU a tel thu sawiin, hlawhtlinna nei tura tha thawktu zawng zawngte chungah lawmthu a sawi a. A+ grade chuan mawhphurhna nasa tak a kengtel tih sawiin, hnung tawlh lova A++ grade hmu ngei thei tura tanlakpuiah kalkhawmte a sawm a ni.

Vawiin hun hmanah hian Prof. Pravakar Rath, Pro-Vice-Chancellor chuan inlawmna thu sawiin, Prof. Diwakar Tiwari, Director, IQAC hnen atangin report ngaihthlak a ni a. Prof. Lalnundanga, Registrar-in lawmthu sawiin hun hman a khar a ni.