MLA-ten Lalrintluanga Sailo ralna leh Death Gratuity hlanna hun hmang

Aizawl | August 5, 2025: Vawiin khan Mizoram Legislative Assembly member-te chuan July ni 21, 2025-a boral Dampa bialtu MLA Lalrintluanga Sailo, ralna leh Death Gratuity hlanna hun, Aizawl, Luangmual-a a chenna inah an hmang a. Assembly Speaker Lalbiakzama'n he hun hi kaihruaiin, Home Minister Pu K. Sapdanga’n hunserh a hmang a ni.

Mizoram Legislative Assembly Additional Secretary Lalthangmawia chuan Section 16 of the Mizoram Salaries, Allowances and Pension of MLA Act, 1999 angin a nupui Pi Lalbiakthuami hnenah Death Gratuity nuai 15 a hlan a ni.

Ralna hun hmannaah hian Deputy Speaker Lalfamkima, Leader of Opposition Lalchhandama Ralte, Dr K Beichhua, MLA leh C Ngunlianchunga, MLA ten thlahna thu an sawi bawk a ni.

Lalrintluanga Sailo hi Zote khaw Lal ni thin, Lalnguauva Sailo leh Lalhmingliani te fapa niin June ni 13, 1960 khan Durtlang Hospital-ah a lo piang a.

Kum 1975 ah Ch. Chhunga High School atangin Pawl 8 zir zovin 1976 khan, kum 16 mi a nihin India laka zalenna sualtu, MNF zawmin hnam sipaiah a tang a, remna leh muanna a lo awm tak hnuin khawtlang enkawlna lamah inhmangzui nghalin khawtlang tan theihtawp chhuah thin mi a ni a. Kum1990 khan MNF Ticket-in Luangmual Village Council Member atan hneh taka thlan tlin niin, Village Council President a ni nghal a, Village Council ah hian Term 4 chhung zet thlan tlin niin Term 3 VCP niin Term 1 (khat) Member a ni.

Kum 2003-ah MNF Gen. Hqrs. ah Joint Secretary atan ruat niin kum 2009-ah MNF Gen. Hqrs General Secretary-a tan ruat a ni leh a.

Kum 2018 leh 2023 inthlanpuiahte Dampa Bial atangin MLA-a thlan tlin a lo ni tawh bawk a. Ram leh hnam tan thahnemngai taka a thawhlaiin, vanduaithlak takin natnain a tlak buak a, July ni 21, 2025 khan Max Hospital, Delhi-ah a lei zin kawng a lo zawh zo ta a ni.