Mizo Talent boruak a sang zel; mipui vote judge pangana a ni dawn ta!

Aizawl | August 22, 2025: Mahindra XUV 3XO Mizo Talent intihsiak boruak a sang chho zel a, contestant te an tang a, an fans te pawh an tang na chho zel a. Mipuiin vote theihna siam a ni tawh a, judge 4 te bakah mipui vote chu Judge pangana atan hman a ni tawh dawn.

LPS Vision Production in an puan danin, Mizo Talent intihsiak neih mekah hian mipuite chu Judge pangana an ni tawh dawn a, Ningani zana intihsiakna neih zawh a nih atangin mipui te vote thlak theihna tur siam nghal a ni a. LPS Vision Youtube Channel-ah vote thlak theihna siam a ni a, hriat theih chinah vote tla a tam tawh hle a, August ni 23,2025 (Inrinni) chawhma dar 10 thleng vote a thlak theih dawn a ni.

Ningani zanah LPS Arena, Falkland-ah a ti tha zual thlan chhuah mi 14 te'n intihsiak an hmachhawn a, Mizo Talent Contestant zinga mipui ngaihnat rawn Lalrinawma, Nalzawl a che tha leh hle a, Lalnunsanga hla 'D hlui' tih chu phenglawng hmangin mawi takin a rawn tum a, thiam tih a hlawh leh hle.

Lam thiam ngaihzawn rawn Kolasib Nula Lucy-i pawh a che chhe hran lo, mahse zan dang erawh a phak lo deuh em tih theih a, Judge te pawhin a nguai thu leh a hah em tihte an zawt hial a, che chhe tak a ni lo a, lem ziahna hmanrua nen stage a rawn mawi a, a lamin mit a ti tlai viau.

Khawvelin hmuhnawm a tih reality show ngaihhlut American Got Talent leh show danga ral atanga kan lo thlir thin ang kha Mizo Talent ah hian Mizo fate ngeiin an rawn lan tir a. Ningani zana Acrobatic thiam Margareth Malsawmzuali rawn in lan zet chu a pui ngei mai, thlahrang ang maia in chei bawlin, a taksa a her ki kawi kual a, Judge thutna lam te a pan phei a, Miss Rosy-i a tlan chhe hial, pui tak a ni.

A tha zual thlan chhuah an ni tawh bawk a, hming mala tarlan te bak Contestant dangte pawh an che tha tlang hle mai a. Judge te tan pawh intihsiakna sang zawka tel tur thlan chhuah a har tan tawh dawn hle in a hriat.

Mahindra XUV 3XO Mizo Talent hian mipui ngaihhlut a hlawh chho ta hle a, Social Media platform hrang hrang luah lum tu a nih bakah khawlai titi a tling chho mek. Inrinni zanah intihsiakna neih chhunzawm leh a ni dawn a, show tan tirhah result puan a ni anga, a la tling ten intihsiakna an nei chhunzawm ang.