KTP Gen Conf-a 'Beautiful Day' hit puitu Laldinsangi film lamah

Aizawl | August 26, 2025: Champhai nula, KTP General Conference 2024-a 'Beautiful Day' (Mizo Version) hit puitu Laldinsangi chu a vawi khat nan film puitling ah a in lan dawn a, Gospel singer chuai thei lo, lemchan thiam bawk Andrew Laltlankima nen an chang dun dawn.

LifeWay production chuan Mizo Kristian Movie 'NOZOMI' an buatsaih mek a, hetah hian champhai nula Dinsangi hi a changtunu a ni dawn a, tunah hian ngawrh takin Kolasib-ah shooting an nei mek.

Dinsangi hi mi tam takin an hmelhriat tanna chu kum 2024-a KTP General Conference atang khan a ni a, Variety programme-ah 'Beautiful Day' (Mizo Version) chu sa in lawm a hlawh hle a, he hla hi Music Video ah chantirin, tunhnaia Gospel hla ngaihthlak hlawh ber te zinga mi a ni.

Dinsangi hi KTP buatsaih short film ah te lo in lan tawh thin mahse movie puitling ah erawh tun hi a vawi khat channa tur a ni thung a, lemchan khawvelah pawh a duai lo hle.

He Movie-ah hian Mizo film industry-a hnu hma ngah tak, zaithiam lar ni bawk Andrew Laltlankima a in lan dawn bawk a. A ni hi kum 2024-a reality Show hlawhtling tak Youth Icon-ah khan judge zinga a tel bawk a. Hna tul hrang hrang avangin film lamah han reh deuh mahse a channa film thar kan hmu leh dawn e.

Andrew-a hi Mizo Movie hrang hrangah a lo in lan tawh a, a channa movie te hi ngaihven hlawh tak a ni zel a, tuna mi pawh hi a hmuhnawm leh hle tura beisei a ni.

Tunhnaiah Mizo film thar chhuak thar a awm reng chungin Kristian Movie tak erawh a chhuak thar a awm mang lo a, Andrew-a leh Dinsangi te chan dunna 'NOZOMI' hi chhungkuaa en ho tlak, zirtir nei tha, kristian movie tha tak tur nia ngaih a ni.