checkgate-a a pawnga puia pawisa khawn tihtawp a ni - Home Minister

# constable lak thar te hi khirh leh fimkhur taka lak an ni a, thlan satliah an ni lo tiin vawiinah hian Mizoram Police-in bung thar kan kai a ni
Drugs tawlhru te mai bakah ngawlvei te hian rukruk leh pawi dang an khawih thin avangin nun an ti ralti a, kan do a ngai a ni

Serchhip | August 26, 2025: Vawiin khan Home Minister K Sapdanga chuan Thenzawl Police Training School ah tunhnaia Constable lak tharte training hawnna a hmanpui a. Supply Minister B Lalchhanzova chuan Home Minister hi a tawiawm a ni.


Khuallian Home Minister K Sapdanga chuan tun tuma constable lak thar te hi khirh leh fimkhur taka lak an ni a, thlan satliah an ni lo tiin vawiinah hian Mizoram Police-in bung thar kan kai a ni, a ti. Training chhungin an rilru leh theihna zawng zawng hlan turin a fuih a, mipuite thlamuanpui tham police zahawm nih tum turin a chah a. Police uniform hlutzia leh zahawmzia hre tura fuihin Home Minister chuan an uniform hakin a entir - discipline a taka lanchhuah tir turin a fuih a ni.

Home Minister chuan Excise, YMA leh Police te tanghoin drugs leh ngawlvei do beihpui thlak an tum thu a sawi a. Drugs tawlhru te mai bakah ngawlvei te hian rukruk leh pawi dang an khawih thin avangin nun an ti ralti a, kan do a ngai a ni, a ti. Home Minister a nih atangin K Sapdanga chuan kuhva tawlhruk nasa leh zuala an do thu te, checkgate-a a pawnga puia pawisa khawn tihtawp a nih thu te leh Police inenkawlna kawngah hmasawnna hmel an hmuh hrang hrangte he hunah hian a sawi bawk.


Supply Minister B Lalchhanzova chuan constable tharte fuihna thu sawiin eng vanga helai hmuna lo kal nge, eng ti tura PTS Thenzawla awm nge an nih tih chu an thinlung luah reng tu leh an awm chhunga an nun kaihruaitu ni se a duh thu a sawi. Thuawihna nun nei tur leh tuarchhel turin a fuih a, khawvel hi mi pangchangte hrehawmna, mi tuarchhel te nuam tihna hmun a ni, a ti a. Mi dangte puih beisei loa mi dangte tanpuitu nih tum zawk turin a chah a ni. Pu B Lalchhanzova chuan police te chu kan hnam rohlu an ni a, mipuiten kan thlamuanpui che u a ni, a ti a. Kan ram tan vawiinah in training a ni tih hriain theihtawp chhuah ang che u, tiin a fuih a ni.

Director General of Police Sharad Agarwal chuan tun tum hi Mizoramah kum 10 chhunga a ruala police lak hnem ber tum a ni, a ti a. Constable basic training a tel te fuihin kum 30 atanga 35 chhung vel chu police chhungkuaa telin, police hi an nihna a ni tawh dawn a, chuvangin thahnemngai taka training a, Mizoram Police te thil tum a taka nun chhuahpui turin a fuih a ni.

Tun tum Constable Basic Training hi batch 70-na an ni a, an vaiin constable 277 an ni. Training tan hun (start date) hi kumin September ni 1 atangin a ni a, training tan hma kar khat hi zero week ti a vuahin constable thar te luh hun leh an tlangnelna hun atan hman a ni. Indoor leh outdoor training kar 45 chhung ngawrh takin an kalpui anga, July 2026 ah zo thei tura beisei an ni. He training course hi uluk taka duan niin, mahni invawng thei mi, mi tha, khawtlang leh ram tana mi hlu chherchhuah chu an tum ber a ni.

Heng Constable lak thar te hi Aizawl District atangin 138, Lunglei  District atangin 24, Serchhip  District atangin 21, Champhai District atangin 23, Mamit District atangin 12, Kolasib District atangin 19, Hnahthial District atangin 6, Saitual District atangin 12, Siaha District atangin 4, Khawzawl District atangin 5, Lawngtlai District atangin 3 an ni a. An zingah hian hmeichhia 26 an tel a ni.

Vawiin programme hi PTS Vice Principal Zomuanpuii’n a kaihruai a.  PTS Principal Pu Lalthakima chuan kalkhawmte lawmna thu a sawi a, Addl SP (Training Branch) Pi C Lalbiaksiami chuan lawmthu sawiin hun hnung a khar a ni.






















Ads:


Modern Industry, Chaltlang
Steel Fabrication, Stainless Steel Fabrication

(Steel hmanga siam chi bungrua leh hmanrua hrang hrang kan siamsak thei.)
Contact: +919612327177

[Join WhatsApp channel for updates- https://whatsapp.com/channel/0029Vb66gtL8KMqnoM2JIz12 ]



Post a Comment

He post chungchanga i ngaihdan lo sawi ve rawh:

Previous Post Next Post