"ZPM kan sawrkar theihna chhan pawimawh tak pakhat chu, 'corruption kan ti ve dawn lo,' tih kha a ni a, vawiin thlengin kan la fihlimin ka hria,”

Aizawl | July 28, 2025: Vawiin hian ZPM party chuan party office-ah chhung inkhawm kan hmang a; he hunah hian ZPM General Headquarters Consultant Rev Dr K Thanzauva, chuan thu sawiin, "ZPM kan sawrkar theihna chhan pawimawh tak pakhat chu, 'corruption kan ti ve dawn lo,' tih kha a ni a, vawiin thlengin kan la fihlimin ka hria,” a ti.

Rev Dr K Thanzauva chuan, ZPM Vision chu Pathian rorelna ram a ni,. Kum 1972 UT kan nih atangin vawiin thlenga kan hmasawnna tithuanawptu chu corruption a ni. Chu chu hriain, Çorruption kan ti lo vang, kan ti a ni. District Council Budget kha ₹ 440 lakhs chauh a ni a, kum 2025- 2026 Budget kan pawm tak kha ₹ 15,198.76 crore lai a ni ta. State dang tluk lo mah i la, kan lo rethei rei tawh em a, kan hak a ni. ZPM kan sawrkar theihna chhan pawimawh tak pakhat chu, Çorruption kan ti ve dawn lo, tih kha a ni. Kan MLA candidate zawng zawngin Pathian hmaah an intiam a, vawiin thleng hian an la fihlimin ka hria a, ka lawm tak zet a ni. Kawng a chhia tih pawh kan hria, siam that a la ni zel dawn. Corruption erawh chu CBI, ACB, Lokayukta ten man lovin court-ah te thiam chang mah se an asset neih zat kan hria a, Mizoram mipui rilruah thiam an chang chuang lo. Tuna kan ram hruaitute hi term tawp thlengin lo rinawm zel u la; tichuan, kan thlang tling leh ang che u,’ a ti.

Thanzauva chuan, ‘Zofate hian ruih kan bang lo va; Kristian kan nih hmain Zu kan rui a, Kristian kan ni a, sakhua kan rui leh a. Politics a lo lut a, Politics kan rui leh a, drugs a lo lut a, drugs kan rui leh suau suau a. Chumi hnuah Information Technology a lo thleng a, social media leh cellphone kan rui leh a nih hi. Kum 2024 chhung khan zu avangin mi 71 an thi a, Kum 2025-ah hian mi 50 zet an thi tawh a ni. Chhungkaw kehchhia siamtu lian tak chu zu hi a ni. Mizoramah hian ruihhlo ngaite enkawlna Home leh Center hrang hrang kan ngah hle a; enkawl an nih lai chuan an sim thei a, an lo chhuak a, rei lo te hnuah ruihhlo bawihah an tang leh thin. Tunah erawh sorkar, kohhran leh tlawmngai pawlte hmalaknain hma thar lak a ni ta a. Hulhliap Short Stay Center-ah pawh an taksa, rilru leh thlarau lamah an hrual hnuin thiam thil an neihna turin an la um zui zel dawn a ni. Hengte hi Sorkar hmalakna kan la hriat ngai loh thil a ni a, a lawmawm tak zet a ni. Zirna lamah tan kan lak a ngai hle a, School 70 chuang ka tlawh chhuak tawh a, a bikin Elementary School-ah tan kan lak a ngai zual a ni. Zirtirtu thenkhat, zirlai naupangte aia Transfer & Posting a buai zawk te pawh ka hmu a, insiam thatna tur hmabak kan la ngah hle a ni,’ a ti.

He hun hmannaah hian Adviser to CM (Finance) leh ZPM Legislature Party Secretary TBC Lalvenchhunga chuan Khamrang leh Buichali inkar kawng thawm that dan report a pe a. ‘NHIDCL mawhphurhna ni mah se lirthei te an lo din thup takah chuan a ram neitu kan nih angin hma kan la mek a. PWD Minister-in a hmunah a tlawh a, chumi hnuah Chief Minister hnenah harsatna te a thlen a. Kawng thawm that lailawkna turin Nuai 100 dah nghal a ni. ZPM Legislature Party Meeting chu kar hmasa Inrinni zan khan kan thu khawm a, he kawng enkawltute hi Vai an nih avangin boulder lakna tur te an haihchham a; quarry kawng a lo chhe bawk nen, a hmun ngeia vilpui hi tha kan ti a, a tul chen chen MLA leh Minister ten ni tin an vil tawh dawn a ni. Tun dinhmunah harsatna lian zual sut kian tawh a ni a, lirthei tangkhang pawh zanin lamah chuan a awm tawh lo tura ngaih a ni,’ a ti.

Vawiin chhung inkhawm hi ZPM General Secretary TBC Lalthanmawia'n a kaihruai a, Rev Dr V Kapenga’n hunserh a hmang.

ZPM General Headquarters President Lalliansawta, Minister -te - PC Vanlalruata, Lalrinpuii leh Lalnghinglova Hmar te bakah MLA thahnem takin chhung inkhawm hi min uap a ni.

[Join WhatsApp channel for updates- https://whatsapp.com/channel/0029Vb66gtL8KMqnoM2JIz12 ]