"Zoram hmasawnna rahbi pawimawh hi Congress party tuk a ni deuh vek a. Congress Sawrkar laia engkim tihfel tawh, sawrkar inthlak tak avanga MNF party ten phuailuai taka an chhunzawm leh suasam Falkawna Referal Hospital tur chu chhunzawm zel tlak lohin an chhuah,"

"Mizoram Political Party zingah Congress Party-in hotu a nei tha ber a, Sawrkarna siam tura party future nei bright ber," ~ MPYCC Sr.Vice President

Aizawl | July 28, 2025: Vawiin July 28, 2025 Thawhtanni hian Congress Bhavan-ah Devotion neih zawhah MPCC Political session neih a ni a. He hunah hian MPYCC Sr Vice President Ngurdingpuia Pachuau chuan thu a sawi.

Ngurdingpuia Pachuau chuan, "Congress party chu kan hruaitu zahawm tak Pu Lal Thanhawla atang tawha thutiam hlen thin, kan ti ang tih tihlawhtling thin kan ni" a ti.

"Zoram hmasawnna rahbi pawimawh hi Congress party tuk a ni deuh vek a. Congress Sawrkar laia engkim tihfel tawh, sawrkar inthlak tak avanga MNF party ten phuailuai taka an chhunzawm leh suasam Falkawna Referal Hospital tur chu chhunzawm zel tlak lohin an chhuah a, an building sak te luahtu awm lovin a ram a, mi thenkhatin ar vulh nan te an hmang mai mai a nih kha.

"Lal Thanhawl kaihhruai Congress Party sawrkar a lo lang leh a, hmathlir thui tak nen Building hnuchhawn leh ram tawh, Hospital ropui tak ni tur, ar vulhna atana an hman tak mai mai chu thar thawh lehin, tunah chuan Mizorama Hospital kan neih that ber leh changtlung ber a lo ni ta. ZMC&H tun dinhmun a thlen theih nana sulsutu pawimawh ber chu Pu Lal Thanhawla kaihhruai sorkar laia Health Minister leh kan president ni mek Pu Lal Thanzara hi a ni.

"ZMC atang hian Doctor zir chhuak mi 265 lai awm tawhin, final result nghak mek hi 22 an awm bawk a. Doctor zir chhuak tawh zinga 169 hian Internship training an ti zo tawh a, 96 in internship an ti mek bawk. ZMC ah hian Foreign atangin Medical Doctor 12 laiin internship hi an rawn ti zo ve tawh a ni. Tunah Doctor zirlai mek hi mi 360 – 380 inkar an awm bawk a. He Medical College atanga Doctor zirlai leh chhiar chhuak tawh, admission ti mai tur belhkhawm hi Foreign atanga MBBS zirlai internship 12 ti zo tawh tel lovin mi 745 lai an tling tawh a ni. Doctor zir chhuak tawh mi thahnem tak Sawrkar leh Private a thawk tawh an awm bawk a ni.

"Hetiang khawpa thangtharte tana mellung pawimawh leh rohlu phuntu, dawt leh thubelhchian dawllo, suangtuahna(dream), a tak ram thleng ngai lo tur sawi ve ngai lo tur leh sawi ve miah lo tur President, Pu Lal Thanzara kan nei hi Congress Party te kan vannei hle a ni" a ti a.

"Congress Party in Zoram hmasawn nana a lo thawh nasatzia hi miten an chhut chiang a, an hre chho zel a. Congress party boruak a eng chho zel a, mipuiin kum 2028 Inthlan huna party future bright berah an ngai mek a ni. Pathian leh mipui zarah sawrkarna kan chan ngei hi ka ring tlat a ni.

"Mipui hian kan beisei loh anga Sawrkarin thil a tih a, ro an rel hian kan ning thuai thin. Kum 10 sawrkarah mai ni lo, kum 5 tlin hma pawhin kan in ning hman hle tih ZPM sawrkar hmaa term khat lek sawrkar MNF party sawrkarah khan a chiangin, mipuiin kan duh lo a, kan paih anih kha. Mipuiin kan hnawl nachhan pawh a chhut peih tan chuan a chiang viau.

"‘Min enchhin ve rawh u’ tia thiam thil chitin reng nena, tha ber leh danglam bik tura inzuar, mipui ten ZPM te kan thlang tling a, sawrkarna an han chelh ve a. Pawn lam atanga thlir ang ngawt a nih lohzia an hmu chiang zel a, Inthlan hmaa “Keini chu kan danglam bik tur a ni, kan tha bik tur a ni. Chumi khami chu kan ti ve lo ang”, tia Zoram mipui hmaa an lo tiam zawng zawng te an palzut a, ”Kan ti ang” an tih te an ti lo a, “kan ti ve lo ang”, an tih te an ti leh bawk si, a buaithlak lam deuh chu a ni.

"An hotupa leh ZPM Party-ah hian mipui rinna a tlahniam nasain, a hmaa anmahni tana awr phiar tawng tawnga tan a, vote-tute rilru an hliam a, anmahni vote tute an inchhir mek a ni. Kum khat leh thla 8 vel chauh an la sawrkar a, Term khat an chelh zawh meuh chuan duhlotu an ngah tawh viau ang tih hi mipui tam zawk titi a ni" tiin MPYCC Sr. Vice President chuan a sawi bawk.

Monday Devotion leh Political Session hi MPCC General Secretary R Vanlalvena, Ex-MLA chuan a kaihruai a. MPCC Secretary Upa H Lalchhuanmawia hnen atangin Pathian thuchah ngaihthlak a ni bawk.

[Join WhatsApp channel for updates- https://whatsapp.com/channel/0029Vb66gtL8KMqnoM2JIz12 ]