Minister C Lalsawivunga leh Adviser to CM (technical) Er Ginzalal ten Sairang

Aizawl | July 28, 2025: Vawiin ni 28 July, 2025 (Thawhtanni) khan Minister C Lalsawivunga leh Adviser to CM (technical) Er Ginzalal chuan Sairang to Kawnpui kawng chhe lai an tlawh a, NHIDCL leh PWD hotu a hmuna awmte nen chak zawka hmalak dan tur an sawi ho.

Minister Sawivunga leh a team te chuan Kawnpui leh Sairang in kar kawng chhe lai chu zawhin, an thawh chin te enfiah zel a ni a,hnathawktute chu chak taka hna thawk tur leh a chhe zual lai ngaipawimawh a siamtha vat vat turin an hriattir a ni.

July 26, 2025 (Inrinni) zan khan Kawnpui leh Sairang inkar kawngpui chhia leh chumi nghawng harsatna sut kian dan ngaihtuahin ZPM Legislature Party informal meeting hmanhmawh neih a ni a, a tuk Pathianni zing khan PWD hotu liante koh khawm an ni a, an hnathawh dan tura Mizoram sorkar duh dante hrilhfiah an lo ni tawh bawk.

ZPM Legislature Party hian he kawngpui pawimawh avanga harsatna a taka vil turin Crisis Management Committee an din nghal a, kawngpui siam hi nitin Minister leh MLA pahnih talin tlawh ziah turin an rel a, NHIDCL leh PWD-te hnathawh hi a hmunah endikin an vil ṭhin ang.